Gobernador di Aruba, Su Excelencia Alfonso Boekhoudt, riba diabierna 27 di mei 2022 a asisti na e ceremonia protocolar ora cu e barco di patruya Zr.Ms. Groningen a drenta waf di Aruba.
E yegada aki a wordo acompaña pa un saludo ceremonial consistiendo di dos parti. Cu e prome saludo di 08:30’or a duna 21 tiro di cayon for di e bandera di Reino riba e barco, contesta pa 21 tiro di cayon for di tera na Governor’s Bay. Segun tradicion, Gobernador Boekhoudt a observa e prome parti di e ceremonia for di e balcon di Cas Ceremonial.
Despues Comandante di Marinierskazerne Savaneta, LTKOLMARNS Art van Beekhuizen, a ricibi Gobernador Boekhoudt na Governor’s Bay na otro banda di Cas Ceremonial. E segundo saludo di 09:00’or tambe a consisti di 21 tiro y riba tera a contesta cu un saludo di honor militar.
Despues di e bishita cortico den waf di Aruba, e barco a sigui cu su tareanan antidroga den region Caribense.
