Diamars atardi Minister di Turismo y Salud Publico Sr. Dangui Oduber tabata na clubhuis hadicurari caminda a celebra e despedida di Sr. Rafael Statie. Esaki a keda organisa pa Wine and Dine Corperation Aruba caminda Sr. Statie a labora ultimo. Pa Minister Oduber e tabata un placer di por tabata tey pa celebra hunto cu Sr. Statie e bunita trayectoria di 50 aña trahando den Food & Beverage y e sector turistico.
Sr. Statie a cuminsa su trayectoria na Manchebo caminda e la traha pa 11 aña largo, e la cuminsa como busboy, despues a bira server, waiter y captain waiter. Despues Sr. Statie a bay traha na Sint Maarten como manager di un restaurant caminda e la keda pa 4 aña largo. Depues Sr. Statie a bin Aruba bek y a traha 17 aña na aeropuerto den hospitalidad y tambe mas restaurant rond di Aruba tur den e posicion di manager. Ultimo Sr. Statie a traha 10 aña na Wine & Dine como restaurant manager. Su conseho na tur trahador di food & beverage ta pa tin hopi pasenshi cu nos bishitantenan.
Minister Dangui Oduber den nomber di Gobierno di Aruba ta gradici Sr. Rafael Statie pa duna 50 aña di su bida na e sector turistico. Danki pa bo dedicacion, bo leyaltad y e servicio cu bo a sa di brinda na nos localnan y nos turistanan, specialmente den food & beverage aki na Aruba.
Aruba su forza ta turismo, pesey cada trahador mester ta un embahador di nos turismo.
