Pais Aruba ta den un impase innecesario cu CAFT, pa cual e impase ta conduci na un peticion pa aanwijzing. Sinembargo por a suchca Promer Minister splica cu riba varios punto, CAFT no tin rason y no kier rasona.
Ta ora pa busca un tercera instancia pa investiga y trece un conclucion.
Den pasado a haci uso di WODC, pa cual nos ta kere cu esaki ta un trabao cu WODC tin cu haci, esta bay check e cifranan y ponencianan di CAFT, pero tambe e consequencianan.
Si bo pidi pa elimina overtime, ki consequencia esey lo tin? Ta pone siguridad di nos pais den peliger.
Si pidi pa corta 60 miyon florin di AZV, contra tur conseho, ki consequencia e tin? Un reto enorme pa servicio medico pa pueblo.
Si pidi pa no manda placa pa Serlimar, ki consequencia esey lo tin, awor cu Serlimar ta den Surceance? Lo causa ciere di e Serlimar, 200 trahador na cas y sushedad lo keda gespart rond Aruba.
Pues, cortamento di gasto ta bon, pero mester sosode na forma responsabel.
Ta ora pa busca contacto cu WODC y pidi nan asistencia pa nan bay papia cu e TRIO, cu nan unico meta ta pa causa pobresa na Aruba.
Ta bon pa laga World Health Organisation duna tambe un opinion di e recorte di 60 miyon y su consequencia.
Nacionnan Uni a reconoce y ta promove cu mester combati pobresa na mundo, SDG # 1 No Poverty, y awor CAFT kier net lo contrario door di yuda crea pobresa na Aruba. Ta di spera cu riba nivel di Gobierno di Aruba y Gobierno di Hulanda sano huicio ta prevalece pa no perde for di bista cu e ser humano su calidad di bida mester keda central den un mundo ‘nobo’ aki.
