“Mi ta aprecia tur input y recomendacion cu a ricibi di cada un gremio commercial”
Manera cu a anuncia siman pasa, despues cu a reuni cu sindicatonan di sector publico y sector semi publico tocante e situacion entre Aruba y Hulanda, Prome Minster Evelyn Wever – Croes a invita gremionan comercial tambe pa un reunion. Premier Wever – Croes a expresa cu e ta contento y ta aprecia cu tur gremio invita a asisti e reunion y tambe ta contento cu e input valioso cu a ricbi di cada uno.
Durante di e reunion a trata e tema di conseho di aanwijzing di CFT, e tema di pagamento di 5%, e ley di Wever – Croes norm, sosten di likides y finansas. E gremionan, a trece nan preocupacionnan padilanti, entre otro e ‘timing’ pa un reforma fiscaal mirando e efecto inflatorio.
“Mi a tuma nota di hopi di e recomendacionnan cu nan a duna nos, y esaki nos ta bay trata nan den Conseho di Minister proximamente y mi ta kere cu nos tur ta riba un liña. Aruba ta pasando den momentonan critico, dificil y hisa impuesto so no ta algo cu ta bay yuda nos sali di e problemanan cu nos pais ta aden.” Prome Minister a accentua cu den esaki gremionan comercial y Gobierno ta para riba un liña y esaki ta yuda pa proximamente ora cu bay Hulanda pa delibera, pa por pone tur cos den contexto.
Prome Minister a expresa cu e tabata un bon reunion y ta aprecia tur input y recomendacion cu a ricibi di cada un gremio comercial. Ora cu bolbe bek for di Hulanda, lo organisa otro reunion pa follow-up riba e puntonan aki.
“Aruba ta pasando den momentonan difcil ainda, pero ainda tin un pida pa bay. Ta mira cu turismo ta desaroyando sublimemente, cual lo percura pa economia draai miho. Ora cu yega e nivelnan economico prome cu pandemia bek, lo bay mira cu Aruba su finansas publico tambe ta bay ta mas miho. Pero hunto, Gobierno y gremionan comercial mester haci’e. P’esey ta aprecia tur nan input cu nan a trece den e reunion”, Premier Wever – Croes a termina bisando.
