Diamars mainta ex minister Otmar Oduber a wordo yama dor di landsrecherche, unda el’a wordo invita pa pasa recoge tur caha di documento, computer, harddisk cual ta tumando basta lugar den oficina di landsrecherche y cu nan no mester mas di nan.
E hecho cu a manda yam’e pa bin busca bek su materialnan, no necesariamente kemen cu e caso a termina.
NORMALMENTE ora cu e yamada aki drenta, ta indicacion cu e caso a termina, investigacion a cera y cu e proximo yamada cu Otmar lo por haya ta cu un bode di Ministerio Publico lo acudi cerca dje personalmente pa entrega un carta, unda e su nominacion di sospechoso a termina y cu e caso a cera. Hopi ves casonan asina no ta ni yega corte, pasobra no tin ingrediente, base legal, pe bay corte.
Nos no ta bisa cu esaki lo ta e caso, pasobra Ministerio Publico tin otro opcion tambe, cual ta un interne behandeling di e caso, esta un TOM-zitting. Un sospecho por wordo persigui pa corte y como ultimo opcion lo por seponeer e caso.
E sentencia cu SOLO DI PUEBLO a analisa, cual ta di un huez comisario, a bisa cu no tin nada contra ex minister Oduber y loke cu tin, no ta implica un culpabilidad di Oduber.
Ta trata aki di dos denuncia den su contra, pero tur dos ta fofo.
E prome keho ta di un departamento di polis, BCI-polis, y e di dos keho ta di ex minister Marisol Lopez Tromp, cu a denunci’e pa empleadonan spirito.
Loke a bin sali na claridad, ta mustra cu den ningun di dos caso, tin prueba cu Otmar a comete delito. Esey ta palabranan di huez comisario.
E tempo aya a bin sali na cla cu pa e caso di tereno, no tin nada den file cu solamente un “storia” di BCI, pero sin ningun prueba. Huez Comisario a bisa cu e no por usa e keho di BCI pa sigui tene Otmar cera y pa colmo no tin prueba pa substancia e keho di BCI. Di loke a spera di ta un caso grandi di corupcion cu tereno, a bin sali na cla cu e file di Ministerio Publico ta chikito, sin nada relevante.
Na di dos ocacion, huez comisario a dicidi pa complace Ministerio Publico, pa bolbe cera Oduber pa 10 dia mas, pasobra segun Fiscal, ainda tin 10 hende pa wordo interoga. A bin compronde cu den e lapso di 10 dianan ey, ningun persona a wordo busca pa wordo interoga.
Pues, e caso Flamingo ta tambaleando?
