Ta habri un otro mercado importante
E anuncio di Gobierno, ATA, Airport y British Airways ta marca un milestone pa Aruba su turismo.
Den sector di turismo, e anuncio aki a wordo grandemente celebra, pasobra ta trata di un mercado virgen, o sea nobo y cu hopi potencial.
Turismo di Inglatera ta conoci cu tin hopi potencial y cu tambe ta busca calor, solo, lama y beach, pa pasa algun dia riba un dushi piña colada.
E ruta aki tambe por trece demas turista di otro pais di Europa, cu por usa e hub aki bini Aruba.
Pa hotel y economia e ta un boost. Mas turista, mas placa drenta nos economia, mas servicio, mas trabao, mas bienestar.
Solo di Pueblo ta felicita tur esnan cu a logra esaki, pero laga nos sigui busca mas vuelo di Alemania, Francia, y demas paisnan. Hopi ta bula pa Punta Cana, pero nos mester busca nan pa bini Aruba.
Cu Aruba ta caro, no ta problema, mescos tin cliente pa Gucci cu Prada, tin cliente pa Aruba. No necesariamente esnan cu tin hopi placa, kier bay lugarnan hopi barata. Nan kier calidad servicio y prestigio.
