MEP a trece Vaderpiet y lo trece Rincon
Partido MEP ta tuma nota di e comportacion ultimamente di Partido AVP. Un comportacion no solamente infantil pero sigur tambe anti pueblo di Aruba. Partido AVP parce cu no ta contento cu cosnan ta bayendo bon pa Aruba. Cada biaha cu bin un desaroyo bon y nobo pa nos pueblo, AVP ta yora, sapatia, critica y ta cuminsa papia locura pa asina bruha tera y tapa nan bagamunderianan di nan gobernacion.
AVP ta sapatia di rabia di tanto scucha di energia limpi mientras cu e unico cos cu AVP a haci ta masacra e companianan estatal. Uza fondonan pa paga locura tras di locura, paga avionnan priva pa trece Richard Brenson, Al Gore, biaha rond di mundo hunto cu nan prensa favorito, entre otro.
Partido MEP a tuma nota cu Parlamentario Gerlien Croes, un hoben politico cu den tempo record a pone su mes den e rating di 0 credibilidad. Un Parlamentario cu te ainda no por bisa di con e no por drenta Merca pero si ta bini cu yen storia. E mesun storianan cu AVP a conta rond mundo di nan vision di energia cu a wordo rechasa rotundamente. Pregunta na Gerlien, bo ta contra Energia limpi tambe? Pasobra boso Partido ta contra di tur desaroyo pa Aruba nada ta bon pa boso”.
MUNDIALMENTE TIN UN CRISIS DI ENERGIA
Awe, AVP kier cuestiona e molinanan di biento unda cu mundialmente tin un crisis di energia crea pa un guera na Ukraine. Segun Mike Eman, AVP si tawata tin un vision, un vision den tempo di bonanza. Ta bon pa nos recorda señor Eman cu no ta tur vision ta un vision adecua of realistico. Pa proyecta su vision irealistico, Mike Eman a uza e molinanan na Vaderpiet, cu tawata un proyecto di MEP bou maneho di señor Nelson Oduber, pa saca potret y paga miles di florin di placa di pueblo pa Mike Eman sali den tur revista. Di e manera aki, Mike Eman a crea un imagen di engaño. E vision aki a manda Aruba casi bancarota pa asina crea un imagen falso di nan lider Mike Eman.
PARKE DI MOLINA NO POR TA MAS CERCA CU 850 METER DI VIVIENDA
Urirama tawata mucho serca di casnan di hende y demasiado serca di Alto Vista.
Centenares di hende a protesta riba urirama. Tur color politico a uni pa e causa aki.
Parke di molina no por ta mas cerca cu 850 meter (straal) di un vivienda. Esaki ta haci cu no por ubica e parke unda cu ta riba nos isla. Rincon ta ubica pariba di nos isla y ta cerca di e parke di molina na Vaderpiet.
WEB, ELMAR Y UTILITIES ARUBA A UNI
Na 2019 a haci un pre-feasibility / un Masterplan pa Aruba su energia. Despues di e resultadonan ey, na 2020 a sinta hunto como grupo, Utilities Aruba, WEB, Elmar y haci diferente ehercicio. Resultado di e estudionan aki, despues cu e acuerdo cu Eagle a yega na un maximo cu e capacidad di biento nobo cu por wordo instala ta 65 Megawatt. Esaki ta un vision realisabel na unda a tuma e caminda corecto prome cu tuma un decision importante asina.
Piensa el ladron que todos son de su condicion. Pakico un destaho of (expression of interest EOI)? Hustamente pa transparencia. No manera AVP cu tur cos tawata bay sin ningun destaho.
E STORIA DI MIKE EMAN 100% GREEN 2020
E unico Green den e vision di Mike Eman tawata di su color politico. Su vision tawata un storia mas bien y e unico hendenan cu a kere e storia aki ta Franklin Hoevertz Mike de Meza y partido AVP. WEB mes tawata contra di e vision di Mike Eman y Mike de Meza.
LNG TA UN TRANSICION
Mescos cu hopi pais e ta un transicion pa energia limpi pero den combinacion cu parke di molinanan di biento y solar panels. Esaki a ser splica hopi biaha pa e Minister di Energia Sr. Glenbert F Croes.
LOCUAL SI AVP A HACI PA ENERGIA:
AVP no a laga nada cla, AVP tawata tin nada mas ideanan y proyectonan loco y absurdo y irealistico y a laga e companianan paga tur su locuranan.
Awor tin un energy policy carga door di tur stakeholder di energia na Aruba. Asina bo ta goberna drechi. Y Parlamentario Gerlien Croes y AVP por ta contento cu Gabinete Wever-Croes su vision, un vision husto pa nos pueblo, un vision realisabel, un vision corecto. Apesar cu e ta un vision cu lo laga nan sapatia mas, pasobra nan ta contra tur clase di desaroyo na fabor di nos pueblo, Gabinete Wever-Croes ta sigui traha na bienestar di nos pueblo.
