Diadomingo awor lo tuma lugar na Cuba un referendum convoca pa Gobierno di Cuba, unda ta cita 8 miyon Cubano di edad 16 aña bay ariba pa vota na fabor of contra di “Codigo nobo pa famia” cu ta encera matrimonio gay.
E referendum lo bay riba e Codigo Familiar nobo, cu ta legalisa entre otro matrimonio entre parehanan homosexual. E proposicion aki a wordo entrega na luna di April pa haci un amplio consulta popular. E ultimo decision ta keda den man di pueblo, kendenan mester haci e codigo nobo aki revolucionario, inclusivo y democratico.
E voto di cada persona ta secreto. E pregunta cu ta wordo haci ta: Bo ta di acuerdo cu e codigo di famia? Esaki lo keda aproba si e voto ricibi mas di 50% di sosten di votonan deposita na urna.
E codigo ta atende tambe cu otro cambionan y ta wordo promovi pa Mariela Castro, yiu di Raul Castro cu ta promove desde tres decada e lucha pa derecho di comunidad gay.
Gobierno di Cuba a haci un propaganda hopi grandi pa vota “Si”. Di otro banda iglesianan y otro sectornan social ta rechasa esaki y conseha pa vota “no”. Semper Gobierno Cubano tin influencia grandi riba e pueblo via su propio y uniconan canalnan di television y corant.
