UN EDICION SPECIAL.
Proverbionan 8:13 ta para scirbi: E temor di Señor ta pa odia maldad,orguyo,arogancia y mal caminda, y un boca perverso mi ta odia.
Ora nos kier hala atencion di henter nos pueblo cu nos kier proteha nos yuinan for di tur forsa di maldad, no ta nifica manera antes cu mucha tin di cuminsa cana cu conoflok bao di panja, of amuleto, talisman, rabu di coneu, blous hunta den cabes etc, pasobra tur e cosnan ey ta bini for di mundo di supersticion y scuridad.
Pero awe nos kier bisa bo con prepara bo yiu spiritual y mentalmente pa enfrenta e ola di bagamunderia cu ta na caminda pa tur mucha , pasobra tur hende grandi mester sa cu satanas ta envidia y odia tur mucha pasobra Hesus a bisa cu e reino di Dios ta pertenece na e muchanan.( Mateo 18:10 y Mateo 19:14).
Matansa di mucha a cuminsa for di den buki di Exodo caminda Faraon a manda mata tur mucha homber hebreo, pa asina evita cu e hebreonan por hanja un lider, y tambe pa para nan multiplicacion.
Rey Herodes a manda mata tur mucha (Mateo 2:16) di 2 anja bay abao, pensando cu asina lo e por a mata Hesus, pero e no a logra.
Den nos tempo moderno aki e diabel kier horta nos yuinan for di nos di siguiente forma cu Tentacion, Distraicion y Decepcion.
Y pa haci esaki den e tempo moderno aki e ta usa medionan di comunicacion, tv, radio, internet, etc.
Otro forma cu tambe ta birando hopi popular, ta buki, revista, short videos, pero locual ta mas tristo e enemigo ta usa hende grandi cu tin conocemento di locual ta bon y malo pa daña mucha.
Distraicion ta bini ora nos yuinan cay den droga of alcohol, of ta cuminsa pensa cu nan ta gangster, miembro di geng y no kier bay scol mas, y asina resulta den prison.
Decepcion ta bini ora nos como mayor faya cu nos yuinan, bibando un bida inmoral den adulterio, abuso di propio yiu etc, cual mayoria biaha ta termina na divorcio y e yuinan ta keda decepciona, pasobra nan mayornan no ta hunto mas.
Ta na caminda un gran atake riba nos muchanan , pa desvia nan for di caminda di Dios, sembra falta di respet entre mucha cu mucha, falta di respet entre mayor y yiu,tentacion pa bay den cos di scuridad y asina nan mente wordo afecta.
Lo sali riba mercado buki y revista y pelicula cu ta contrario na Dios su principio y su palabra , den tur sorto di forma.
Pelicula diabolico, pa influencia mucha contra amor di nan mayor, y laga nos yama nan agentenan di anti-cristo cu ta viajando y lo sigi viaja rond mundo hibando mal influencia tur caminda.
A yega tempo pa cohe e toro na su cacho y cuminsa haci oracion kibrando fortalesa di demonio, bashando altar di scuridad abao, y cubri nos yiunan cu e Sanger di Cristo Hesus.
Corda bon cu e diabel ta cana rond manera un leon ta busca ken e por devora.
Pesey ta necesario pa nos haci oracion pa nos yuinan.
Tene bon cuenta e weganan, y e peliculanan cu ta drenta cas tanto via di tv/ telefon como esnan cu amigo/amiga ta fia of kier bin cas pa nan wak e hunto.
Esaki no ta yoke ni tampoco fanaticada, pero bo atencion awe pa bo yiu, por evita bo hopi gasto mayan na terapia.Pasobra mente di mucha ta warda cos, mucha no ta lubida facil, y ora e cos ta malo, bo por conta cu e cos ey lo afecta su mente, y despues su bida.
No permiti ningun hende impone ningun tipo di bida riba bo yiu cu no ta bay di acuerdo cu Palabra di Dios.
Especialmente e luna cu nos ta bay drenta aki ( October) hopi cos malo ta bay wordo lansa como wega, tambe pelicula y esaki ta bay sosode mundialmente pero tur tin diablura nan tras.
Tur di un of otro forma kier trece miedo, of pone e mucha duda, y abo como mayor lo ta den un lucha mental y fisico cu bo yiu.
No ta pornada e versiculo di 1 Corintionan 15:33 ya bisa: Mal compania ta daña bon custumber, ta bon pa nos tene cuenta cu e amigo/amiga di nos yuinan.
Y nos ta declara riba tur famia, tur mucha lo siguiente: Salmo 91:11 ta para scirbi: Pasobra E lo duna su angelnan encargo tocante di bo, pa wardabo den tur bo caminda nan,
Sinceramente , Pastor Marcel Balootje.
