ORANJESTAD – Minister di Turismo y Salud Publico, sr. Dangui Oduber, ta recorda cu desde 10 di oktober por pasa DOW pa cumpra bestek pa e proyecto di embeyecimento di Hooiberg.
E proyecto aki lo wordo ehecuta den diferente fase. Full e proyecto den su totalidad lo ta un colaboracion entre Aruba Tourism Authority (ATA) y Tourism Product Enhancement Fund (TPEF).
Ya caba por disfruta di fase 1 cu tawata restauracion di e cuminsamento di e trapi abou, hunto cu e hut na pia di Hooiberg. E prome fase aki a wordo realisa cu fondonan di TPEF na aña 2020. Despues pavia di e pandemia no por a sigui cu e segundo fase.
Pero awor si lo sigui cu e fase di remodelacion di e trapi, tambe di e mirador existente, cu ta mei mei di Hooiberg. Pa mas despues lo traha hunto cu ATA pa construi un mirador nobo na e top di Hooiberg pa asina nos local y turistanan por disfruta di un bista di 360 grado di nos isla. Tambe hunto cu TPEF lo drecha e trapi nan di Hooiberg hacienda uzo di nos artistanan local cu lo duna e trapi un toke artistico por medio di mosaic.
Si tur cos cana segun plan e proyecto aki lo mester wordo entrega na comienso di aña 2023. E proyecto den su totalidad lo tin un costo di alrededor AFL. 650,000 cu ta ensera diferente fase cu no ta solamente loke a wordo anuncia algun siman pisa. E ta un colaboracion di ATA y TPEF hunto.
E meta ta pa Hooiberg bira un atraccion safe, yena cu color pa localnan y turistanan.
Minister Dangui Oduber a menciona cu Aruba ta un destinacion di calidad halto, nos bishitantenan ta paga hopi placa bin Aruba. Pesey ta importante pa nos sigui mehora e producto Aruba, pa nos bishitantenan por haya e valor pa locual nan ta paga. Tur esaki ta den cuadro di diversificacion pa cu nos destinacion turistico.
