A yega tempo, E tempo a yega.
Si asina mes cu un curason yen di gratitud na Dios, Iglesia Pentecostal di Aruba, situa riba Dr Scheapmanstraat 18 enfrente di Macro Supermarket na San Nicolaas, ta invita e pueblo di Aruba den su totalidad, pa ta hunto cu nos den e tres anochi poderoso, di Oracion, Alabansa y Palabra di Dios, cual lo tuma lugar Diabierna 25, Diasabra 26 y Diadomingo 27 di November 2022. Cuminsando tur anochi pa 7 pm den Oracion, y despues drenta Alabansa, y culmina cu e palabra di Dios.
No tin mihor regalo pa bo mes y bo famia, pa hunto boso bishita e campaña aki y laga Cristo Hesus, transforma, boso bida, sana tur herida, y malesa y restaura bo hogar.
Lo ta tres anochi di reconciliacion cu Dios, nos tur ta mira locual ta sosode tur dia riba nos isla, y nos tin cu bin bek serca Señor pasobra solamente Dios tin solucion pa tur cos, solamente den Cristo Hesus nos por deposita nos confiansa.
Esaki ta e oportunidad cu bo tabata spera di trece henter bo famia, pa Dios por pone su man uni y restaura , bendiciona , y alegra curason cu ta preocupa, pa cosnan di bida.
E tempo a yega, pa nos pone nos bista riba Dios Todopoderoso, for di kende nos yudansa ta bini manera, manera David a bisa den Salmo 121.
E tempo a yega pa sigura nos mes y nos famia, den man di Señor, e dianan ta dificil, e tempo no ta mustra bon, pero cu Señor den nos bida nos tin un speransa.
Na tur Hoben esaki ta pa bo tambe, pasobra e tempo a yega pa nos tur, tanto grandi como chikito, rico y pober, no ta importa rasa of color, Cristo tey pa nos tur.
Dios ta stima tur hende, y tur hende tin mes un oportunidad serca Dios .
Nos ta warda boso cu brasa habri, pa nos por uni hunto y Alaba Señor y duna Señor tur honor y Gloria.
No lubida nos ta warda bo Diabierna 25, Diasabra 26 , y Diadomingo 27 di November 2022 pa 7pm-9pm.
Masha Danki,
Sinceramente
Pastor Marcel Balootje.
