Diabierna merdia (ora local) a tuma lugar e wega di futbol valido pa grupo A unda cu Hulanda a enfrenta Ecuador.
Den prome wega di grupo A, Senegal a enfrenta Qatar y aki Senegal a bay cu e victoria cu score di 3-1 y asina Qatar ta bira prome pais pa keda elimina for di Copa Mundial, na 2010 South Africa kende a organiza Copa Mundial tambe a keda afor den fase di grupo, Qatar ta bira e di dos pais cu ta organiza Copa Mundial y no ta logra clasifica pa siguiente buelta.
Ecuador den su prome wega ta gana Qatar cu score di 2-0 mientras cu Hulanda den su prome wega ta gana Senegal tambe cu score di 2-0.
Hulanda a subi tereno di wega, en busca di e tres puntonan aki pa asina sigura su clasificacion pa siguiente buelta cu ta round di 16 y tabata apenas na di 6 minuut cu Hulanda ta bay ariba cu gol di Cody Gakpo cu ta anota su di dos gol den e mundial aki pa pone Hulanda ariba cu score di 1-0.
Ecuador no a cay den otro cu e gol tempranero aki, y a keda hunga bon futbol, tabata pone presion constant dilanti gol di Hulanda, pero defensa y keeper tabata lucha pa mantene e gol di Hulanda limpi.
Casi na final di prome tempo, Ecuador ta bay den contra atake y aki Estupinan ta empata e wega, pero VAR a interveni y ta anula e gol pa motibo cu un hungador di Ecuador tabata den posicion adelanta, aunque e no a participa den e hugada directamente, pero e la blokea e bista di keeper di Hulanda.
Den di dos mitar, Ecuador a subi tereno cu mes un animo, buscando e gol di empate y tabata apenas na di 49 minuut, ariba un bon contra atake Enner Valecia ta empata e wega 1-1, anotando su di tres gol den e mundial aki.
Ecuador den di dos mitar a domina practicamente e wega for di Hulanda, a crea bon oportunidad caminda hasta tironan di distancia a dal den tubo di gol.
Lamentablemente no tabata tin gol mas den e wega aki y asina tambe e wega a termina cu score di 1-1, Hulanda y Ecuador ta yega 4 punto, mientras cu Senegal tin 3 punto y Qatar lamentablemente no tin punto den Copa Mundial 2022.
