Awe mainta e hombernan A.M. (33) y C.J.E.(27) a presenta den Corte pa e caso penal cu Ministerio Publico a cuminsa contra nan. Fiscal ta acusa A.M. y C.J.E. cu 28 Mei 2022 a menaza diferente persona door tira riba nan cu arma di candela. Tambe di a maltrata e homber D. y tabatin un arma di candela. Tur esaki a sosode den e club nocturno Lekker.
SOLO DI PUEBLO por a compronde cu tanto A.M. como C.J.E. a yega di haya condena caba pa posecion di arma di candela. Fiscal a exigi 5 aña di prison pa cada un.
MALTRATO
C.J.E. a admiti di a maltrata e homber D. y cu algun siman promer e tabatin un arma di candela. El a bisa cu el a busca e arma pasobra riba caya tabata wordo bisa cu nan ta busk’e pa mata. Hues a mustra cu e dama T. a declara na Polis, cu A.M. y C.J.E. a bay bringa su primo D. El a bay pa kita C.J.E. for di D. y su pareha a bay pa kita A.M. for di su primo. Ora el a laga C.J.E. bay, C.J.E. a dale cu moketa na cara.
BRINGA PA MOTIBO DI MUHER
Segun A.M. e y C.J.E., nan a bringa cu D., pasobra D. lo tabata basila e pareha di C.J.E. den e club nocturno. Segun C.J.E., D. tabata baila cu su pareha na forma bulgar, siendo cu D. sa cu C.J.E. tin relacion cu e dama. Segun A.M., D. lo tabata papia cosnan cu a pon’e haya problema cu su pareha.
TIRAMENTO
Hues a mustra cu e dos denunciantenan e homber D. y dama T. a declara cu nan a mira A.M. saca man for di auto y los un tiro. Ta asina cu Polis tabata atendiendo asunto di trafico den vecindario y a tende tiro. Polis a papia cu diferente testigo y nan tambe a bisa cu nan a mira C.J.E. y A.M. drenta un Nissan March na Lekker y un a saca man y los un tiro. Tin ta bisa 1 tiro y oto ta bisa 2 tiro.
Hues a mustra cu e pareha di C.J.E. a bisa cu el a huur un auto y a fia A.M. e auto. Doño di e auto a bisa cu e tin GPS den e auto y por a mira e auto tabata core den vecindario di Lekker. Segun C.J.E. y A.M. nan tabata core den un Toyota Corolla color di oro. Hues a remarca cu e GPS ta mustra cu e auto tabata para dilanti cas di A.M. A.M. ta desmenti esaki.
Segun A.M. y C.J.E., e doño di e auto di huur lo ta bende droga y lo a manipula cu e GPS pa nan ta culpabel.
2 ARMA
Hues a mustra cu investigacion di Polis ta mustra cu na apartamento di C.J.E. den Wayaca Residence a haya 2 arma di candela. Segun C.J.E. door cu ta papia rond cu e ta wordo busca pa mata, el a busca un arma. Tanto C.J.E. y A.M. ta bisa cu ta Latino a ofrece nan arma di candela. Hues a remarca cu ta hopi casualidad cu e potret di arma cu A.M. tabatin den su cellular y e arma cu a haya C.J.E. na su apartamento, ta mesun cos. Hues a mustra cu tin testigonan a bisa cu ta C.J.E. y M.A. a tira na Lekker. Nan ta desmenti categoricamente di a tira.
CONDENA CABA PA ARMA DI CANDELA
Hues a mustra cu A.M. tin sentencia caba pa posecion di arma di candela. C.J.E. tambe tin 2 condena pa arma di candela. Hues a remarca cu dos condena den un periodo di 5 aña. Hues a bisa cu ta parce cu C.J.E. no ta siña.
FISCAL
Fiscal a bisa Hues cu e ta haya cu C.J.E. y A.M. ta culpable. Tur e asunto a cuminsa den Lekker caminda a maltrata e homber D. y e dama T. Ta asina cu C.J.E. y A.M. ta admiti di a maltrata D. C.J.E. ta desmenti di a maltrata e dama T. E incidente aki a sosode den oranan di marduga 28 Mei 2022. Segun Fiscal, D. a mira C.J.E. dal T.
PASA VIDEO DEN CORTEt
Fiscal a pasa video den Lekker y tabata a mustra con e pelea a sosode. Ariba e video di seguridad den Lekker por a mira con C.J.E. a bay para banda di D. y tabata haci señal pa A.M. pa dal D. A.M. a yega dal D. cu moketa. Por a mira con e pelea a tuma lugar y hasta a scucha un boter cay. Segun C.J.E., esey ta momento cu D. lo a dal’e cu e boter na su cabez pero no a cort’e.
Fiscal tambe a mustra cu via camera di seguridad por mira e tiramento dilanti Lekker. Tin testigo ta bisa cu a mira C.J.E. bay den un Nissan March. Fiscal a bisa cu a base di declaracionnan, e ta conclui cu ta A.M. a tira. El a mustra cu imagen di camera di seguridad den vecindario caminda ta mira C.J.E. sinta na banda y tabata bisti cu un flanel capuchon color cora. Tambe por mira con e auto ta pasa dilanti Lekker y tira. Aki Fiscal ta mustra bon cla cu no ta un Toyota manera e duo ta pretende sino un Nissan March nan tabata core. Doño di e auto a bisa cu el a huur e auto cu e pareha di C.J.E. y cu GPS a mira unda e auto tabata.
FISCAL A BAHA PISA
Fiscal ta haya legalmente proba tur tres acusacion. El a bisa Hues cu e situacion di tiramento cu arma di candela na Aruba ta alarmante. Pa cu e castigo e ta tene cuenta cu ambos sospechoso a yega di haya castigo pa arma di candela. Esey ta haci cu nan ta residivista. El a exigi 5 aña di prison pa ambos. Hues, despues di a scucha abogado, a bisa cu e ta bay studia e caso y otro aña lo por spera sentencia.
