Diadomingo prome di anja 2023, algo pasa di 9’or di mainta a sosode un accident riba Avenida Nelson Oduber, na altura di e rotonde Superfood, mesora a pidi polis cu urgencia na e sitio, mirando cu e chauffeur cu a ocasiona e accident kier a bandona e sitio.
Un truck di brandweer cu tabata riba caminda a bin topa cu e accidente y mesora a para pa duna asistencia, mientras nan tabata wardando riba un patruya di polis. Nan a bin topa cu e chauffeur di e Volvo shinishi tabata kehando di hopi dolor na su barica y mesora a pidi tambe pa presencia di ambulance.
Na e sitio polis a bin compronde cu e Volvo Shinishi a subi e rotonde sin duna preferencia y a dal patras di e Kia Sportage blanco, despues e la bay dal contra e rotonde. E danjo material tabata considerable.
Ambulance a presenta y despues di a trata e chauffeur na e sitio a dicidi di transport’e pa hospital pa un checkeo medico mas avansa. Takelwagen a transporta e Volvo Shinishi pa warda di Balashi.
