Diahuebs, 2 di februari ultimo Camara di Comercio (KvK) a organisa, conhuntamente cu Nacionnan Uni (UN), un sesion informativo pa e sector comercial. Aruba a ricibi di bishita un delegacion di diferente divisionnan di Nacionnan Uni cu ta acompaña sr. Dennis Zulu, Resident Coordinator a.i. di Nacionnan Uni pa Aruba, Corsou, St. Maarten, Trinidad & Tobago y Surnam.
E meta di e bishita tabata pa fortifica e partnership entre Nacionnan Uni y Aruba riba e area di desaroyo sostenibel, pues Sustainable Development Goals (SDG). Pa stimula desaroyo sostenibel ta importante pa empresanan tambe wordo inclui. Pa e motibo ey UN ta stimula empresanan pa incorpora e concepto di ESG (Environmental, Social, y Governance) den nan empresa. E concepto di ESG ta referi na un set di normanan pa maneho di un compania cu ta encera su responsabilidad social y empeño etico.
KvK a organisa un anochi informativo caminda cu representantentenan di Nacionnan Uni a duna un presentacion y splicacion tocante e concepto ESG, y e oportunidad cu ESG por ofrece na un empresa.
A wordo splica cu factornan medio-ambiental, social y gobernamental (ESG) ta bira cada bes mas importante pa empresanan, ya cu nan por tin un impacto significativo riba reputacion di un compania, rendimiento financiero y durabilidad. ESG por afecta e capacidad di un compania pa atrae clientenan, empleadonan y inversionistanan. Tambe por impacta cumplimento cu regulacion, stabilidad di cadena di suministro y acceso na capital. Companianan cu ta duna prioridad na ESG ta wordo considera mas responsabel y duradero, y tambe por beneficia di un miho maneho di riesgo, tuma decision mas efectivo y ESG ta stimula innovacion. En resumen, incorpora ESG den strategia y operacion di un compania por yuda crea balor a largo plaso, construi un reputacion positivo y aumenta resistencia contra riesgo.
Na final di e presentacion, publico a haya oportunidad pa haci pregunta na e oradornan y a clausura cu un ora di networking.
Pa mas informacion por tuma contacto cu KvK via email: businessinfo@arubachamber.com of por yama na: 582-1566 ext. 30/35/42.
