E ultimo acontesimiento cu a sosode na e cafe Patio 15 di Mark Benson hunto cu su socionan Patrick Paskel y Nelson Speed Andrade, ta precupante.
E local aki a permiti libertinahe sexual tuma lugar den nan establecimiento y peor ainda cu tabata al aire libre, situa na un caya cu hopi trafico ta pasa den Oranjestad.
Videonan cu a circula tabata mustra un ogry total cu a tuma lugar. Unda e doñonan a keda? Unda e security nan a keda? E comportacion aki ta violacion di tur moralidad cu por existi. Mas tristo ta cu tin hendenan cu a perde nan moral y ta aplaudi sex den publico, comosifuera ta algo normal of un normal nobo.
Esaki no ta norma y balor cu nos a lanta cune. Sex ta permitibel, claro cu si, pero e tin su lugar pa haci’e. Exposicion di acto sexual hamas tabata normal aki na Aruba.
Pesey mes e restaurant of cafe cu haci su mes culpabel na e violacion aki, mester wordo castiga of entodo caso mester wordo atendi, cu esaki ta violacion di nan permiso y of mester kita nan permiso di operacion.
Den e pais aki, mester tin ordo! Poco poco por tuma nota si, di hopi persona cu ta aplaudi loke a sosode. Logicamente esey ta bisa hopi di nan mes, nan norma y balor.
E parti positivo ta cu te ainda, e mayoria na Aruba tin consenshi y por dsitingui entre malo y bon.
