Diabierna atardi, 21 di april 2023, na Johan Cruyff Court Denzel Dumfries na Parke Curason na Jaburibari mi a asisti tuma luga e gran apertura di Weganan Interinsular 2023.
Sigur mi ta haya na su lugar pa felicita Gobierno di Aruba, Curacao y Boneiro cu a dicidi pa despues di 7 aña rebiba Weganan interinsular. Weganan Interinsular ta competencia deportivo entre e islanan Aruba, Boneiro y Curaçao. E aña aki tabata trata 6 ramo di deporte, esta dam, ahedrez, atletismo, trefbal, futbol y volleyball. Weganan asina sigur tin un impacto importante y grandi riba desaroyo deportivo di nos pais. No solamente pa e ramonan di deporte pero primoridialmente pa nos muchanan.
Despues cu na luna di maart 2023 e weganan a inicia na Boneiro cu dam y ahedrez, a sigui na Curaçao cu atletismo y trefbal y fin di siman tras di lomba a competi na Aruba den volleyball y futbol. E weganan sigur tabata exitoso y di akinan mi kier a felicita tur nos deportistanan y gradici nan maestronan cu ta haci nan participacion posibel. Na mes momento mi kier a felicita y gradici Juffrouw Tamara Malmberg-Halmet y meneer Elmer Robles de Medina cu a ricibi un reconocimento pa nan aporte, dedicacion y trabou incansabel pa deporte escolar for di Minister di Educacion y Deporte sr. Endy Croes durante di e tremendo apertura di Weganan Interinsular na Aruba. Pa finalisa mi ta felicita y gradici Ibisa, Minister y Ministerio di Deporte y tur stakeholder cu a haci e weganan posibel.
