Archivonan ta consistui di memoria di nacion- y sociedadnan ta conforma e identidad y e pilar di e sociedad pa loke ta concerni informacion. Na momento cu ta pone prueba di acontesimento y di decisionnan cu a tuma lugar, archivonan ta apoya e parti administrativo, mientras na mesun momento na ta e base di e derecho di individuonan, di organisacionnan y estadonan.
Garantizando e dereho di e ciudadanonan pa yega na informacion oficial y conocemento di su historia, archivonan ta fundamental pa e identidad, e democracia, y responsabilisacion y bon gobernacion.
Como reconocimento di e balornan fundamental di archivonan, e Conseho Internacional di Archivonan (ICA) ta dedica na promocion e uso eficiente y eficas di documentonan, archivo y datonan, den cualkier formato y e preservacion di tal como patrimonio cultural y di evidencia di humanidad, atraves di cooperacion internacional, intercambio di experiencianan profesional, investigacion y igualmente e maneho y organsacion di archivonan y institucionnan riba e tereno aki.
E aña aki ICA celebrando su di 75 aña di existencia, ta pone atencion riba e trabou di archivonan y e importancia di documentacion y archivonan. Atencion specialmente ta bay riba e trabou di conservacion di documento, maneho y desiminacion di informacion. Esaki particularmente mira for di e aspecto di e cambionan cu ta tumando lugar riba e nivel di tecnologia y cu ta haci cu incluso e trabou den mundo di archivonan lo bay ta conoce cambio. Mescos cu otro institutonan riba e tereno cultural, rond mundo, ta conociendo cambionan, archivonan tambe ta cambiando nan manera di traha y presenta nan mes na e comunidad. Sociedadnan rond mundo ta cambiando nan bista y asina tambe archivo y otro instancianan di herencia cultural historico ta pasando den cambionan. Asina nos por menciona p.e. cu nos sociedadnan ta moviendo for di un punto di salida colonial of Eurocentrico, pa uno cu mas ta permiti pa expresa nan mes con cos ta hinca den otro. Hopi organisacionnan consecuentemente ta dirigi nan mes pa mustra e diversidad di cultura y origen di nan ciudadanonan, incluyende esnan cu ta marginalisa, descrimina of neglisha. Pa avansa den e tarea aki, institucionnan archivistico, manera otro organisacion den e sector di herencia cultural, ta explorando manera y strategianan con pa ahusta nan maneho, cu ta impacta e profesion na nivel tecnico y tambe teoretico.
Na Aruba tambe esaki ta e caso, mirando e impacto cu COVID tabata tin. Asina 3 organsiacion, esta Biblioteca Nacional, UNOCA y ANA a cera cabes y lanza un portal nobo, den forma inoficial, unda cu nos herencia cultural ta accesibel digitalmente Despues cu tanto Museo Arquelogico y Fondo di Monumento a join fin di aña pasa, na e momentonan aki e ya tin 11 partner den loke no ta yama Coleccion Aruba (coleccion.aw). E portal aki ta permiti e usuari for di confortabilidad di su cas busca den e coleccion di tur e 11 instancianan. Di e manera aki tambe Aruba ta moviendo hunto cu e cambionan y es mas como un pionero den Cariba. Mester menciona tambe otro partnernan strategico banda di e 11, manera Fundacion Amigonan di Archivo, Representacion di Hulanda na Aruba, Fondo Mondriaan di Hulanda, Prins Bernhard Cultuurfonds Caribe, SETAR y Internet Archive (archive.org), cu ta haci realisacion di esaki posibel.
Archivo Nacional sigur riba e dia aki kier a manda un felicitacion na tur esnan cu ta trahando den e ramo aki, esta esun di specialista di informacion. Danki pa boso trabou noble aki, tanto den sector di gobierno pero tambe den sector priva. Un pabien y danki special ta bay tambe na tur esnan cu ta traha na ANA.
