E siman aki e fundador, ex presidente y ex lider sindical di sindicato TOPA ta den corte contra e propio sindicato cu el’a funda algun aña pasa. Motibo di e demanda ta e hecho cu e directiva nobo di TOPA, boa dirigencia di Sr. Alonso Tromp a dicidi pa royeer su persona, pues elimina su miembrecia. E hecho aki no a wordo accepta sin mas dor di Sr. Bernabela, kende a fungi pa hopi aña como lider sindical di e sindicato. Peor ta e hecho cu e royeer aki ta sin motibo, of por lo menos nunca a informa Sr. Bernabela di e motibo.
Tur esaki tin di haber cu sushamento di nomber di Sr. Bernabela y sin prueba. Sr. Bernabela a baha como president di TOPA, segun statuto, y despues di esey un comicion di supervision hunto cu directiva di TOPA a royeer Sr. Bernabela, sin menciona e motibo di un accion asina pisa. E comicion di supervision no a aplica na ningun momento hoor y wederhoor, es decir cu Sr. Bernabela no a haya e minimo oportunidad pa defende su mes.
Esaki sigur ta un blunder diparti directiva di TOPA, cu ta casi imposibel pa kere cu ne alturanan aki, siguiendo varios otro casonan den comunidad, nan no por tabata sa cu por lo menos Sr. Bernabela tin derecho di a wordo scucha y contesta of aclaria cualkier pregunta.
Mas peor ta cu e directiva despues a bay lastra nomber di Sr. Berbabela den comunidad, indicando varios alegacion, sin duna Sr. Bernabela e oportunidad pa pasa e proceso di hoor y wederhoor. Por considera esaki como un acto ilegal.
Parce cu e decisionnan no a keda solamente na Sr. Bernabela, pero tambe e directiva a retira e hurista di TOPA, Sr. Lindo Hernandis, kende tin un trajeceto masha largo mes cu TOPA y unda cu mayoria caso di miembronan di TOPA tabata wordo gana, dor di e amplio conocimiento di hurista Hernandis.
Esaki sigur lo bira un caso intrestante, envista cu huez semper a duna e principio di hoor en wederhoor tur peso legal. Nos lo sigui e caso aki di cerca.
