ORANJESTAD, diahuebs, 20 di juli – Representante nan di CEDE ARUBA y FCCA a firma un acuerdo di colaboración cu lo dura pa cinco aña. E meta di e acuerdo aki ta pa fortalece e programa nan existente den bario y mehora e servicio- y facilidad nan pa e residentenan. E firma di e acuerdo aki ta un paso grandi den e dirección corecto pa un futuro mas prospero pa nos bario nan.
CEDE ARUBA, ta un organisacion di desaroyo y financiamiento ariba tereno social y desaroyo sostenibel, cuta enfoca su energia y recurso nan pa promove avance den nos comunidad Arubano. Recientemente, nan a lansa un plan ambicioso dedica na desaroyo di bario, den cual nan lo sostene organización y iniciativa di bario, y colaboracion entre instancianan. E proyecto aki, a ricibi apoyo di varios centro di bario y ayudo financiero di gobierno di Aruba y mas partner financiero.
FCCA, na su turno, ta dedica su esfuerso riba solución nan pa e falta di cas nan social na Aruba. Nan meta tapa tur famia Arubano, particularmente esnan cu ta enfrenta reto nan grandi pa haya un cas, por conta cu un hogar.Pero nan visión ta bay mas leu; FCCA ta traha activamente pa mehora e calidad di bida den nan bario nan, pa promove diversidad, y pa organisa actividad nan cu por enrikece e bida di su residentenan.
Door di firma e acuerdo aki, CEDE ARUBA y FCCA a planifica patraha hunto riba varios iniciativa. Esaki nan ta inclui financiamento di proyectonan den bario, desaroyo y mantencion di facilidadnan recreativo den barionan, y pa e comunidad en general. Nan ta buskando pa colabora cu otro organización nan cu tin e mesun vision, manera IBiSA, FFD, y varios NGO’s, y departamentonan di gobierno, cu e meta final pa contribui na mehoracion di calidad di bida y desaroyo di barionan mas sano, inclusivo y uni.
Esaki ta un paso grandi den e caminda pa creacion di un futuro mas prospero pa nos bario nan y nos comunidad. E acuerdo entre FCCA y CEDE ARUBA no solamente tarefleha nan dedicacion y compromiso, pero tambe e potencial grandi pa cambio positivo. Nos por mira dilanti cu confiansa y speransa, sabiendo cu e organización nan aki ta trahando activamente pa construi un Aruba mas fuerte y uni.
