Pasobra Marisol no a haci su trabao como Parlamentario den pasado, Hulanda mester a actua contra Aruba na 2015!
Mino por bisa cu mi tabata asombra ora mi wak e declaracionan politico di sra.Lopez-Tromp den prensa riba su pensamentonan con Gobierno ta tratando cu e negociacionan di RAft. Pa pueblo compronde con Raft a yega na nos porta, nos mester compronde e trayecto completo y kende tur a haci cu awe nos tur mester enfrenta e realidad aki. Tampoco ta bay ta un sorpresa pa pueblo cu net esununan cu awe ta grita cu pecho halsa, tabata netesunnan cu a causa, sostene y vota na fabor di e proceso desastroso aki cu awe Aruba ta contemplando un RAft.
Marisol a sostene AVP completamente pa destrui Aruba su Finansa Publico
(1) Marisol Lopez-Tromp como Parlamentario y presidente di Parlament di AVP a sostene tur e deficitnan desastroso di Gabinete Eman I-II. 2010: Afl.188.6miyon, 2011:Afl.325.2miyon, 2012: Afl. 443.3miyon, 2013: Afl.332.8miyon, 2014:Afl.405.8 miyon, 2015:Afl.184.6miyon…y asina Aruba a yega na 86.2% di su GDP na debe(ARA, CAFT, IMF).
(2) Marisol Lopez Tromp como Parlamentario di AVP a sostene, aproba, y apoya e Gobierno corupto di AVP y asina Hulanda mester a interveni pa introduci CAft pa via di nan maneho desastroso. Asina supervision financiero di Hulanda a yega Aruba.
(3) Marisol Lopez-Tromp a sostene desaster, peseye ley di supervision financieroa bin, esta e LAf, ademas di un KB.
(4) Marisol Lopez-Tromp a sostene e proyecto ‘Bo Aruba’ di AVP, cu despues a wordo critica y husga pa Algemene Rekenkamer como un proyecto devastador, maneha iresponsabel, sin por hustifica unda 1.6 biyon florin a bay, 1.6 biyon florin! No tabata tin control y e rapportnan a sali devastador pa Gabinete Eman, pero asina mes Marisol a vota VOOR!
(5) Marisol a aproba pa Gabinete Eman bay di 7 pa 9 minister!
Marisol Lopez-Tromp su posicion riba RAft: ENTREGA SIN NEGOCIA!
Marisol a saca un articulo ultimo aki den cua e ta declara algun punto central:
(1) “Gobierno no kier supervision financiero.” Ma sra.Lopez-Tromp, kico CAft y LAft ta anto? Nos ta pro supervision financiero, sigur despues cu ABO mes a canta den coro VOOR pa e desastre financiero mas grandi den historia di nos pais! Esaki hamas por bolbe sosode!
(2)“Gobierno mester segura cu nos generacion futuro tin un situacion miho akina Aruba”. Ma bon, esey tabata Marisol su pensamento como Parlamentario di Mike Eman, orabo a aproba 2.4 biyon florin na deficit? Bo tabata preocupa pa nos generacionan ora ba grita voor pa redobla nos debe nacional y manda nos pais bancarota?
(3) “Gobierno ta kere cu Den Haag ta Sinterklaas.”No Marisol, Gobierno ta luchando pa haya derecho igual mescos cu Corsou y St.Maarten a haya kwijtschelding. Ta negociando pa varios
punto cu ta importante pa e pais logra den un acuerdo pa cu e ley.Ta luchando pa e miho acuerdo posibel panos pais. Algo cu abo nunca lo por compronde y nunca a haci.
(4)“Parlamento 11 ta mudo.” No, nos ta trahando. Pa ta entreguista di bo mesun patria sin negocia ta un berguensa. Nos a formula preguntanan y ta batayando pa logra lo miho pa Aruba, algo cu abo a haci net opuesto. Ba entrega nos na Hulanda desde 2015! Enbes ba haci bo trabao como Parlamentario bo a obliga Hulanda cay aden. Ta bisto sra.Lopez-Tromp cu abo nunca, pero nunca a lucha pa Aruba y hamas lo cuminsa haci esey tampoco. Awe un biaha mas ba keda desenmascara! Marisol ta prefera “entrega sin negocia!”
