(Foto ta di Curacao.nu). Secretario di Estado Alexandra van Huffelen ta biaha pa Caribe 6 of 7 biaha pa aña. Cada pasa un luna e ta subi KLM cu un delegacion bastante amplio y biaha bin nos direccion.
Su ultimo biahe e siman aki, tabata den cuadro di historia di esclavitud.
Manera ta conoci fin di aña pasa gobierno di Hulanda a dicidi cu lo ofrece disculpa pa e historia di esclavitud contra nos paisnan. Contrario na tur otro pais colonisador, Hulanda no kier a papia di compensacion monetario.
E siman aki su reunionnan a cuminsa na St. Maarten pa un encuentro cu stakeholders di tur pais, di Aruba tambe. E reunion a sali for di man mesora pasobra Hulanda kier pone un fondo disponible pa concientisacion pero cual suma no ta yuda pa mucho. Nan ta pone 200 miyon euro disponible pa reparti entre organisacionnan na Hulanda (1/3 parti) , Suriname (1/3 parti) y Aruba, Boneiro, Curacao, St. Maarten, Saba y St Eustatius (hunto 1/3 parti). Esnan presente a expresa nan malcontento, entre otro cu Hulanda ta tuma nan hasi y no ta sincero cu su disculpa. E comentarionan despues di e reunion tabata di hopi decepcion.
Despues e biahe di secretario di estado a sigui pa Korsow na unda mester a drecha e bon nomber y honra di e esclavo Tula. E tempo aya e colonisador hulandes inhustamente a declara Tula como un criminal y asina a skibi e historia. Recientemente Hulanda a dicidi di drecha e bon nomber y honra di Tula y esey secretario di estado mester a hasi diamars na Curacao. E ceremonia a cuminsa y tur cos tabata prepara. Pero diripiente a bin un mal tempo di pazuid, benta tur cos abou. Biento feros a spanta tur hende y tur a core bai. Na Korsow ta wordo bisa cu esey ta ta un señal, ta e spirito di Tula cu ta bisa pa stop cu e hipocrecia y lag’e na paz. Pa otronan ta simplemente casualidad di naturalesa.
Cualquier cu ta e caso, secretario di estado a dicidi di corta su biahe, cancela un biahe pa Boneiro pasobra eynan tambe lo a spere hopi tension, y a dicidi di bai Hulanda bek despues di apenas dos dia.
E grandinan ta insisti cu esaki no ta casualidad. Segun e grandinan, na tur abuso, na tur hipocrecia, mester yega un punto final!
