Abogado David Kock y DUCAPRO a manda carta pa cobra radio emisora ‘royalties’ pa cada cancion cu nan toca
Dialuna mainta por a tuma nota di kehonan treci dilanti pa algun doño di radio emisora. Nan tabata lansa critica riba e carta cu radionan a ricibi for di abogado David Kock di DUCAPRO.
DUCAPRO ta un fundacion na Aruba cu kier cobra radio emisora derecho di autor, di tur e cancionnan cu nan toca. Algun aña pasa kier a cobra cada radio e suma di Afl. 3000.00. Tin mas o menos 20 radio na Aruba, pues kier a saca Afl. 60 mil pa luna di radio emisora.
Dado momento e calentura a baha y no a tende nada mas. Pero awor atrobe parce cu radionan a haya carta cu dia 1 januari 2024 nan mester cuminza paga, sino lo tuma medida legal contra tur radio.
Realmente ta un situacion penoso, pasobra radio emisora na Aruba no ta gana placa. El’a bira un hobby y pasion. Di unda ta bay saca 3 mil florin? Esey lo hiba varios radio na quiebro.
Ta di lamenta cu organisacionnan international kier chica un isla chikito cu medidanan asina drastico pa asina cobra pe artista y ken sa si e artista lo haya e placa of e lo keda den scochi di e administrador cu lo cobra su salario y saca probecho.
Si e plan aki bay dor, Aruba lo bay conoce un cambio radical den radio emisora unda varios lo mester stop di toca cancion y bay over na otro formato pa por keda existi. Finalmente Ducapro lo no bay logra haya e placa cu e ta desea.
