Dialuna mainta alarma a wordo bati pa e fenomeno cu ta causando daño na e bida marino rond di nos isla. Ta trata aki di un invasion di pisca Lion Fish cu ta forma un menasa serio pa e habitat di bida den lama. E “pisca leon” aki ta manera un boa, pero den lama, cu no ta pordona medio ambiente y causa daño na habitat.
Den e ultimo simannan e costa di Aruba ta confrontando un menasa teribel di e pisca Lion Fish. Originalmente di e region di Indo-Pacifico, e piscanan aki cuminsa haci nan mes doño di awanan rond di nos isla, causando un desbalance den ecosistema marino.
Habitat:
E Lion Fish ta penetra den e rifnan y area di barancanan di costa di Aruba. Nan habilidad a permiti nan broei rapidamente den e ambiente marino.
Consequencianan:
Apesar di nan bunitesa, e pisca-leon ta destrui e populacion di pisca local debi na nan apetito feroz y nan reproduccion rapido. E interrupcion den e cadena alimentario ta afecta henter e ecosistema, incluyendo e rifnan di coral y spesienan di pisca nativo cu pa tradicion a habita rond nos isla.
Impacto:
E broeimento descontrola di e lion fish ta causando un escases enorme di piscanan local cu efectonan malo riba e rifnan di coral. Algun sorto di pisca ta esencial pa ecologia di rif, y awor nan a wordo reduci y lion fish a crece.
Ningun esfuerso pa comati e invasion:
Mientras cu e bida marino ta na peliger, no a tende nada di ambientalistanan manera Greg Peterson, cu mas bien tur dia ta riba Isla de Oro y Papala’s, pero e menasa serio di lama mes, nunca el’a bin dilanti pa papia di dje ni tampoco papia di solucion.
Instancianan local tampoco a informa comunidad di e problematica aki. Si e permiti e pisca aki haci doño di nos awa, nos bida marino ta muri morto morto.
Conclucion:
E invasion di e pisca leon ta representa un reto significante pa e ecosistema marino di Aruba, pero esfuersonan conhunto mester trece solucion pa mitiga su impacto negativo y preserva e bunita naturalesa di nos isla.
