Diabierna ultimo Gabinete Wever-Croes a realisa apertura di e Operation Command Center. Un centro di mas moderno den ful nos region y esaki no solamente door di e inversionnan den material y infrastructura, pero tambe door di e hecho cu ta trata di un colaboracion entre diferente entidadnan di Cuerpo Policial mes, pero tambe entre Cuerpo Policial y otro departamentonan den e cadena hudicial.
Manera Minister Tjon a indica den su discurso dia di e apertura, siguridad di un pais no ta algo cu ta bin di su mes. Ta rekeri di e inversionnan necesario den nos departamentonan hudicial pa nos por garantisa siguridad. Pesey mes como parlamentario mi a aproba e maneho y inversionnan proponi pa Minister Tjon na diferente ocasion. Inversion den material y infrastructura, pero mas importante ainda inversion den tecnologia y recurso humano (esnan cu ta haci e trabou).
Riba dia di e apertura Minister Tjon a elabora riba e 4 pilarnan di e vision pa garantisa siguridad pa nos pais. Pa crea e condicionnan adecua pa e trabou por keda haci efectivamente y eficientemente, Gabinete Wever-Croes sigur a bin ta duna e prome dos pilarnan, esta material y infrastructura, e atencion y importancia.
E Operation Command Center ta forma parti di e dos otro pilarnan di e vision pa garantisa siguridad, esta tecnologia y recurso humano, inversion den nos polisnan. Manera Minister Tjon a enfatisa, e inversion den e dos pilarnan aki ta crucial pa por garantisa cu como organisacion, Cuerpo Policial por sigui desaroya y atende cu e demanda cu ta bini riba nivel local y internacional y e cambio constante cu tin den criminalidad.
Despues di a haya un recorido y splicacion di e operacion dia 21 di juni, mi por bisa cu e ta impresionante. Un Operation Command Center moderno y yena di innovacion. E centro aki ta bay atende yamadanan di Central di alarma, y ta monitorea diferente parti di nos isla cu un total di 258 camera y radar rond di Aruba.
Ta trata aki di un sistema di camera ubica na diferente parti di nos isla cu e meta pa eleva e siguridad tanto pa nos pueblo como pa nos bishitantenan. E sistema di cameranan aki ta basa riba ‘realtime intelligence’ cu momento cu tin un sucedido por tin acceso inmediatamente, cual sigur tin su beneficionan. No solamente pa e trabou como polis den accion pero tambe esun di investigacion.
Un pabien sigur ta na su lugar pa tur stakeholder cu a haci e proyecto aki posibel. Gradicimento na Setar, Cuerpo Policial, Gabinete Wever-Croes y especialmente Minister Tjon y Ministerio di Husticia y Asuntonan Social pa nan vision y trabou duro.
