Algun dia pasa presidente di Parlamento a informa cu tin tres candidato cu a wordo proponi pa bira Ombudsman. For di media nos a haya sa e nombernan di e tres candidatonan pa e posicion. Un comision “independiente” cu ta consisti di abogado David Kock y hues Maurits de Kort a hasi e proposicion.
Un di e nombernan cu a hala hopi atencion ta Kathy Paskel, Directora di Dimas, un persona cu regularmente ta den noticia, no tur ora positivo.
Loke a hala atencion ta cu Kathy Paskel a start un campaña via su primo Patrick Paskel den media, indicando cu ta e mihor candidato, hasiendo asina un auto promocion.
Locual a hala mas atencion ta, cu esun co-responsabel pa su nombracion ta abogado David Kock, siendo cu David Kock ta/tabata abogado di sra Paskel den varios caso den corte contra pais Aruba.
Segun nos, si encaso abogado David Kock a prepara e nombracion, esaki NO ta corecto.
Esaki ta conflicto di interes!! E tin un relacion di abogado – cliente cu Kathy Paskel.
Un conflicto di interes asina ta inaceptable y ta atacha e imagen imparcial cu un OMBUDSMAN mester tin na Aruba. Den otro paisnan algo asina hamas por sosode.
E abogado David Kock mester a retira su mes di e comision ora el’a signala dicho conflicto di interes. Nos no por a lesa cu esaki tabata e caso.
Si en caso e no a retira su mes, e candidatura di Kathy Paskel mester wordo descualifica. Un persona asina no ta contribui na e imparcialidad y integridad cu Aruba ta busca den su Ombudsman.
Nos ta spera cu Parlamento di Aruba hasi lo corecto!
No ta prome ves cu Abogado David Kock ta sirbi Dios y Diabel alaves. Mientras e ta den Raad van Advies pa conseha gobierno, cu otro petchi e ta abogado di Benny Sevinger cu a hasi su mes culpabel na corupcion cu tereno di pueblo, y asina Kock a defende e acusacionnan di corupcion.
