Awe mainta Hues di Corte di Husticia a dicta sentencia den e caso penal cu Ministerio Publico a cuminsa contra Lainda Westerhof, ex Parlamentaria di AVP, su ex pareha Niurick Hereira y e yiu di Lainda, D.K.(17).
SOLO DI PUEBLO por a compronde cu Hues a declara Lainda Westerhof liber pero a condena su yiu homber y su ex pareha.
Luna pasa tratamento di e caso a tuma lugar caminda Fiscal a acusa Lainda Westerhof (L.W.) y Niurick Hereira (N.H.) di hunto cu otronan posecion di cocaina y marihuana riba 20 December 2023. Tambe Fiscal a acusa nan di cu entre 1 Augustus 2023 y 20 December 2023 a bende cocaina y posecion cocaina.
E yiu homber di L.W., D.K.(17), y N.H., Fiscal a acusa di hunto a causa lesion fisico grave riba 26 November 2023 riba e homber B. Fiscal a bisa cu intencionalmente a dal y scop varios biaha e persona B. na su cabez y cara. Ta asina cu B. a keda cu sicatriz na cara. Ta asina cu tempo di e incidente aki, D.K. tabatin 16 aña.
FISCAL A EXIGI CASTIGO
Dia 28 Juni 2024 durante tratamento di e caso, Fiscal a bisa cu e ta considera esaki un atraco cu violencia. E homber B. a keda for di tino. Despues cu e tabata for di tino, D.K. y N.H. a horta su pertenencianan. Fiscal a mustra cu N.H. ta un residivista. Apenas el a sali for di KIA algun luna y e ta bolbe haci delito serio. D.K. ta un bringador professional y asina mes e ta bay maltrata un homber burachi.
Pa N.H. Fiscal a exigi 42 luna di prison, 6 luna condicional y 3 aña di prueba. Pa D.K. Fiscal a exigi castigo hubenil di 60 dia di cual 40 dia ta condicional y 2 aña di prueba bou guia Reclasering. Tambe Fiscal a exigi castigo di trabao pa comunidad di120 ora of 60 dia sera. Pa L.W. Fiscal a exigi 180 dia di prison, 104 dia condicional, kitando 76 dia cu el a sinta caba y 2 aña di prueba.
SENTENCIA
Hues a bisa cu e no ta haya legalmente proba cu e dama L.W. tabata den posecion di droganan y tampoco di tabata bende. Hues a declara L.W. liber.
Hues a bisa cu e no ta haya proba cu N.H. a causa maltrato severo, pasobra no tin ningun indicacion cu e homber B. a keda cu sicatriz na su cabez door di e maltrato.
Hues ta haya legalmente proba cu N.H. ta culpabel di intento maltrato severo. Pa loke ta ladronicia, Hues ta haya cu N.H. hunto cu D.K. a horta cosnan di e victima.
Hues ta haya legalmente proba cu H.H. tabata den posecion di cocaina y marihuana y cu e tabata bende. Hues a rechaza e defensa cu e investigacion na e cas di L.W. tabata ilegal.
Pa cu e castigo, Hues a tene na cuenta cu N.H. den su tempo di prueba di un condena pa maltrato, ta bolbe haci mesun cos. Hues a condena N.H. 40 luna di prison, di cual 6 luna ta condicional cu 3 aña di prueba. Hues a bisa cu e droga confisca lo wordo destrui y e placa lo keda confisca.
E hoben D.K., Hues ta hay’e culpable di intento di maltrato severo y tambe ladronicia. Pa cu e castigo, Hues a tene na cuenta cu D.K. tabatin 16 aña y mester aplica e ley hubenil. Hues a condena D.K. na 40 dia di prison, di cual 20 dia ta condicional cu 2 aña di prueba,bao guia di Reclasering. Tambe Hues a condena D.K. na 100 dia di trabao pa comunidad y si no cumpli 50 dia sera.
