Un biaha mas e luna aki, tristesa ta bati na nos porta y awe nos ta despedi di un otro “Life Member”, esta un amiga di mayoría di e miembronan di Women’s Club of Aruba (WCA),
sra. Aida Briezen cariñosamente yama “Dada”.
Aida a join WCA na aña 1971, tabata un miembro hopi valioso y un boluntario ehemplar pa nos club den añanan 1970 padilanti te na su añanan di biehes, cual a pone cu no tabata posibel mas p’e atende nos reunionnan general di miembrecia di tur luna.
Nos miembro Aida tabata forma parti di directiva como Chairman di comision di Welfare, Study Group, y tambe como Member-at-Large. El a traha boluntariamente den varios comision, specialmente esun cu tabata bishita nos grandinan na Huize Maris Stella y St. Michael Paviljoen pa entretene nan cu wega di bingo y pa yuda organisa fiesta.
Aida tabata un persona masha contento y alegre, nunca su amiganan a mir’e rabia of bira fastioso y e no tabata conoce e palabra NO. E tabata cushina masha delicioso mes y a duna hopi les di Study Group den su cushina na Colony. Su specialidad tabata traha bolonan dushi y decora nan masha bunita. Pero no tin nada pa surpasa su dushi bolo preto cu nos tur a conoce y ta saboria cada aña na september pa aniversario di su club stima. Na e di 80 aniversario di club, ainda nos a ricibi su bolo preto di sorpresa!
Na aña 2011 Aida a ricibi su reconocemento pa bira un “Life Member” pa su servicio boluntario fiel pa 40 aña den WCA. Asina mes, despues cu e no tabata por a bin reunion mas, tur luna e tabata keda en espera di su bulletin pa e por a les’e di padilanti te patras y mas despues ora su curpa a bay atras, un persona tabata les’e p’e.
No mucho aña pasa, Aida a haya un luga na un di casnan di nos grandinan, unda na su turno el a ricibi e atencion special di esnan cu el a yuda pa alegra otronan den pasado. Aki nos miembronan di Welfare cu ta haci e trabao di boluntario tabata topa cu Aida y por a bishit’e de bes en cuando. Su amiganan Mena Anthony, Anna y Maria Geerman pa menciona algun.
Aida a duna su servicio na otronan den su bon añanan y na su vuelo sin regreso, e por a ricibi e cariño y cuido di buelta.
Aida, awo nos ta despidi di bo, pero nos kier pa bo sa con agradecido nos ta, cu nos por a comparti añanan di amistad y hermandad cu bo como un fiel miembro di nos prestigioso club.
Palabranan di sincero condolencia na su yiunan, demas famia y na tur su amiga-, conocir- y rumannan den hermandad boluntario di WCA. Cu nos “Dada” stima sosega na paz!
