Nos por mira claramente cu den Bijbel e tradicion di Israel, e hudiunan ta dera semper nan curpa morto. Mientras cu den mundo tin pueblonan den creencianan paganismo, den reencarnacion y nan si ta crema y ta kima nan curpa morto.Tin paisnan na mundo no ta permiti cremacion di curpa. Bijbel ta bisa, cu nos curpa ta bira stof manera cu mester ta durante tempo, pero Bijbel no ta bisa, cu nos curpa ta bira shinishi pa medio di kimamento di curpa. Den Bijbel Genesis 3: 19, Dios Tata ta bisa: “Cu sodo di bo frenta lo bo come pan te dia cu bo bolbe den tera, pasobra ta di eynan bo a wordo saka. Pasobra di stof bo ta y di stof bo ta bolbe bira.”
Bijbel Eclesiastes 12: 7 ta bisa: “Bo curpa ta bolbe bira stof, ta bay bek den tera y bo alma ta bay bek na Dios, pasobra ta El ta esun cu a duna b’e.” E tradicion di deramento di curpa, ta wordo demostra den Bijbel Testamento Bieuw y tambe den Testamento Nobo. Lesa loke Bijbel ta bisa den 1 Corinthionan 15: 44, Apostel Pablo ta bisa: “Ta dera un curpa mortal y un curpa spiritual ta lanta for di morto.” Den Bijbel Mateo 27: 59 y 60: “Hose di Arimatea a cohe e curpa di Hesus, a lor’e den un panja nobo di lenen y a pon’e den su mes graf. Tabata un graf nobo cu el a laga coba den baranca.” I tin hopi mas capitulonan den Bijbel cu ta papia di deramento di curpa y no di kimamento di curpa. Pa medio di bautismo, nos curpa ta tempel di Dios Spirito Santo cu ta biba den nos y ta haci nos curpa un instrumento di honor pa Dios Tata. Por mira e curpanan di e Cristiannan y di e Santonan cu a muri hopi siglonan pasa y nan curpa a keda intacto, incorumpibel pa motibo di nan bida santo. Por ehempel, San Padre Pio, Sta. Bernadette Soubirous, Sta. Cecilia, San Huan Bosco, San Juan Vianney y hopi mas defuntonan cu a muri y nan curpa a keda incorumpibel, den Bijbel e salmo 16: 10 y 11 ta bisa: “Pues Bo no ta entrega mi alma na morto, ni Bo ta laga mi curpa sufri corrupcion. Bo ta mustra mi e caminda di bida, e goso grandi cu ta di mira Bo Cara, delicianan pa eternidad banda di Bo.” Pesey ta con un famia ta laga crema curpa di nan ser stima y mientras cu Cristo-Hesus kier pa curpa di hende keda incorumpibel pa motibo di nan bida Cristian y santo? Cristo-Hesus mes a wordo dera y E’l a lanta Su mesun curpa for di morto, p’esey tur hende Cristian ta kere cu nan deramento den santana ta un testimonio pa e Resureccion cu tin di bini. Nos curpa ta tempel di Spirito Santo y p’esey nos curpa mester wordo trata cu honor y cu respet. Ta con un famia lo bai sinti, cu nan ser stima a pasa pa medio di candela ardiente y a bira shinishi? Na anja 1886, e Santo Oficio di Vaticano a prohibi e cremacion di curpa na e funeralnan. Na final di siglo 19, tabata tin lantamento y protestanan di hendenan no Catolico na Europa pa promove e cremacion di curpa. E Iglesia Catolico a rechasa e movimientonan aki, pasobra e hendenan aki cu ta defende cremacion, nan tabata rechasa e creencianan Cristian di inmortalidad di alma y nan no tabata kere den e resureccion di curpa. E Codigo di Derecho Canonico di anja 1917, Iglesia Catolico ta prohibi un deramento Cristian, na cualkier persona cu a ordena pa su curpa wordo crema. Na anja 1963 Vaticano a cuminsa permiti cremacion di curpa, solamente ora un persona muri den enfermedad di epidemia, na paisnan na unda cu no tin lugar pa dera y na ora di desasternan y guerra. E Codigo di Derecho Canonico actual di anja 1983 den e Canon 1176 ta bisa: “Iglesia Catolico ta conseha su fielnan, pa conserva e piadosa custumbernan di deramento di curpa di e defuntonan.” Awor, ta e famianan ta keda responsabel, si ta dera nan defuntonan manera cu Dios Tata kier of manera e otro creencianan di mundo ta haci. E responsabilidad aki ta keda pa cada un di nos dicidi segun su consenshi.
Seferino Tromp
