Dialuna mainta, durante conferencia di prensa di Gobierno di Aruba, Minister di Husticia y Asuntonan Social sr. Rocco Tjon, a elabora riba e proceso cu ta andando pa algun aña caba, pa sigui profesionalisa Arumil. E meta di e proceso aki ta pa yega na un concepto di ley nobo, pa di e forma ey por stop di uza e “dienstplicht verordening” como base, mirando cu esaki ta un ley di hopi aña atras. Pues, a base di un landsverordening nobo como tambe un landsbesluit nobo, por regla e rechtspositie di e Arumiller mucho miho.
Esaki ta bay den bon cooperacion cu diferente departamento aki na Aruba, manera DRH, y Directie Wetgeving cual ta bay wordo involucra, pero tambe cu departamentonan na Curaçao y Hulanda. Siman pasa, e mandatario a reuni cu director di asuntonan huridico di ministerio di defensa di Hulanda, alabes a reuni cu e brigade general di ministerio di defensa y commandeur Hansen kende ta e hefe maximo di Kustwacht, Arumil y Curmil.
Un reunion sumamente importante y positivo, caminda a repasa tur e diferente pasonan cu a wordo tuma caba. Manera a indica, na 2022 y 2023 ya caba cierto conceptonan a wordo traha, e vision y direccion strategico unda kier bay cu Arumil a wordo defini. E trayectonan pa por logra esaki a wordo defini y e conceptonan ta cla. Pues, aworaki tin un ‘timeline’ defini, caminda november di e aña aki, e version final di e conceptonan di ley aki lo ta cla, pa di e forma ey, directie wetgeving por tira un bista riba esaki. E intencion ta pa na inicio di 2025, inicia cu e trayecto di ley, cu miras pa prome di januari 2026, e leynan aki drenta na vigor.
E proceso aki ta bay nifica un cambio grandi pa e Arumillers pa loke ta nan rechtspositie, nan lo bay wordo nombra como ambtenaar, pa despues di nan trayecto como Arumil nan por sigui den e cadena hudicial. Pa e motibo aki, e involucracion di DRH tawata sumamente importante, pa asina por a defini e diferente trayectonan cu ta bay bin, mirando cu e overstap pa un Cuerpo Policial lo ta diferente cu e overstap pa KIA, mirando cu ta trayectonan diferente.
A base di e anticipacion pa 2026, ta bay haci un analisis di cuanto Arumillers lo mester sali for di servicio pa comienso di 2026, pa aworaki caba por cuminsa cu e trayecto pa educa nan, pa di e forma ey nan por drenta na un Cuerpo Policial, KIA, CEA etc. Ya caba den e diferente reorganisacionnan cu ta andando, manera esun di Cuerpo Policia, ta tene cuenta cu Arumillers lo por wordo incorpora den e organisacion aki, na algun departamento specifico.
Pa esaki por bira un realidad, e training lo tin cu cuminsa na tempo, y for di Hulanda aduna di conoce cu nan ta dispuesto pa pone e fondonan aki disponibel pa por educa e Arumillers.
