Diabierna mainta, durante santo sacrificio di misa, a celebra e 38 aniversario di nos Cuerpo Policial di Aruba, y como tal Minister di Husticia y Asuntonan Social sr. Rocco Tjon, tawata presente pa asina duna pase na e celebracion di “Korpsdag” en conexion cu nan aniversario.
Minister Tjon a inicia e mainta felicitando Cuerpo Policial cu nan di 38 aniversario. E ta importante pa reflexiona riba kico a haci Cuerpo Policial uno autonomo y respeta, manera cu e ta awe. Pa ta un Cuerpo respeta y confiabel, local como tambe internacionalmente, ta ensera cu como Cuerpo bo ta produci, bo escogencia nan strategico ta corecto, y bo capital humano ta consisti di personanan dedica na nan trabou.
Durante e 38 añanan aki, cambio tawata inevitabel y cambio ta e factor di mas importante pa haci un organisacion resiliente. Pues hopi cambio a tuma luga e ultimo 38 añanan. Asina por menciona cu a bin cambionan den ley, maneho, material, uniform, liderazgo, strategianan pa combati criminalidad, opleiding di Polis y mas. Cambio no ta facil, pero na mes momento pa un organisacion como Cuerpo Policial cu ta brinda siguridad pa nos pais, cambio ta necesario.
Pa nos por garantisa e mesun desaroyo aki e siguiente 38 añanan, e ta importante pa nos cumpli cu e demanda di esnan cu ta traha den Cuerpo Policial. Pasobra e constelacion di e organisacion a cambia y lo sigui cambia e añanan nos dilanti.
Actualmente Cuerpo Policial di Aruba ta consisti di 523 empleado, di cual 146 a drenta servicio na aña 2014 bin ariba, cual ta nifica cu 30% di e organisacion ta consisti di personal cu tin sea 10 aña of menos di experencia. Sinembargo, manera ta conoci, na oktober y november binidero lo bay tin klasnan nobo, y alabes si conta e averahe di esnan cu ta bay cu pensioen cada aña, e porcentahe di 30% menciona, lo subi y lo yega mas serca di un 45% pa 50% di coleganan cu tin 10 aña of menos di experencia.
Pues, bisando esaki, pa garantisa Cuerpo Policial su exito e añanan nos dilanti, cambio lo keda necesario y inevitabel. Cambio di tipo di liderazgo, cambio di mentalidad y cambio di custumber. E apelacion ta bay pa henter e ekipo di Cuerpo Policial di Aruba pa para habri pa e cambionan necesario e temponan nos dilanti, pa asina hunto nos por sigui traha riba e exito di Cuerpo Policial di Aruba.
