Aña pasa, den luna di october, Horacio Oduber Hospital (HOH) a firma un acuerdo oficialmente cu Wilhelmina Kinderziekenhuis (WKZ) cu e meta primordial pa intercambia conocemento y experiencia riba tereno di cuido di mucha. Ya caba por mira e frutonan di e intercambio aki danki na e biaha aki presencia di pediatra Jansen di UMC Utrecht cu a bin Aruba pa asisti e team di pediatra cu muchanan cu tin mester di atencion special riba tereno di reumatologia y inmunologia.
Intercambio di conocemento
Dr. Marc Jansen, Pediatra inmunologo-reumatologo di UMC Utrecht, tin alrededor di 4 luna aki na Aruba unda e ta asisti e team di pediatra na HOH. Ela bin Aruba debi na e colaboracion cu tin cu Wilhelmina Kinderziekenhuis na Utrecht. Dokter Jansen a expresa cu su experiencia aki na Aruba ta uno masha ameno y cu e ta sinti su mes hopi bon bini. E pediatranan di ambos hospital por siña di otro mirando cu cada ken tin diferente conocemento y experiencia.
Aki na Aruba ela logra mira mucha cu problema inmunologico of di reuma cu normalmente ta wordo atendi pa pediatra local Louise Rafael-Croes. Ambos dokter a traha hunto y a mira tur pashent durante e consultanan. E beneficio di t’ey presente na Aruba ta cu si algun problema presenta den futuro, dokter Jansen conoce cada caso di cerca awo y por atende cu e pashentnan for di Hulanda mes hunto cu e pediatra di Aruba dunando asina un miho tratamento ainda y eleva calidad di cuido di mucha na Aruba.
Crea base solido
Pediatra dr. Louise Rafael-Croes a comenta cu e acuerdo entre HOH cu UMC Utrecht ta encera traha hunto pa e siguiente tres añanan y eleva conocemente. Durante e añanan aki cada tres pa cuater luna un specialista di mucha lo bini Aruba for di Utrecht. E idea tras di esaki ta cu nan lo trece tur nan experiencia for di Hulanda, p’asina Aruba por tin un base mas solido y amplio pa atende cu e pashentnan cu tin mester atencion specialisa.
Esaki ta brinda apoyo enormemente den loke ta nos esfuerso pa logra yega na cuido di mucha amplio y di calidad na Aruba mirando cu te awo ta cuater pediatra tin na Aruba. E intercambio di pediatra aki ta nifica cu e pediatranan di HOH lo bay Hulanda tambe pa haya mas conocemento y profundisa nan mes den nan area di experticio.
Dr. Rafael-Croes a expresa cu e mes lo bay e poli di dokter Jansen na Hulanda unda cu e tambe lo traha cu dr. Jansen eynan y alabes atende su consultanan na Hulanda pa amplia su conocemento. Ademas, lo mira si ta necesario pa implementa cierto cambionan aki na Aruba na beneficio di pashent. Meta ta un futuro unda nos muchanan ta saludabel y contento den nos Hospitalnan.
