E tareanan principal di Parlamento ta pa controla Gobierno (ministernan) y sirbi como co legislador. Ministernan tin cu duna cuenta na Parlamento.
Cada aña parlamentario, miembronan di Parlamento ta eligi un Presidente di Parlamento. E Presidente tin e poder y autoridad pa dicidi ki dia y ora un reunion den Parlamento lo tuma luga. Por ehempel, ora tres parlamentario pidi pa un reunion pa un minister bin duna cuenta, ta na e Presidente pa fiha un fecha, cu segun reglamento di ordo mester tuma luga dentro di 30 dia.
Imagina bo cu un Presidente di Parlamento ta complace ministernan di su partido, prolongando ki dia e ta yama reunion, haci un reunion un openbare bijeenkomst cual ta haci cu parlamentarionan no por entrega mocion contra e minister, y no cumpli cu laga reunionnan tuma luga dentro di 30 dia manera reglamento di ordo ta stipula.
Y ora e fraccion di su partido no kier trata un ley, e ta complace nan pa no yama e reunion lunanan largo, a pesar di a haci toezegging prome cu e reunion lo tuma luga pa tal luna y siman.
Ora despues di hopi esfuerso pa toch e yama e reunion (laat), e Presidente di Parlemento – net prome y durante e tratamento – ta purba cambia interpretacion di decadas di regla di votacion, cual por a influencia si un ley pasa of no, dependiendo di con ta conta abstencion di voto.
Weganan asina ta mina democracia di un pais. Nos sistema democratico nunca por funciona debidamente si Parlamento ta wordo maneha pa complace y proteha esnan cu nan mester controla.
Un partido no por exigi di su partner di coalicion pa bira complice y participa na maluzo di poder, eligiendo e mesun Presidente cu a demostra di ta maluza su poder pa sirbi interes di su partido. Menos ainda si e Presidente na ningun momento a duna indicacion di lo eherce su funcion diferente, y menos ainda si den tur rasonabilidad, e partner den coalicion a propone pa e mesun fraccion presenta un otro miembro di nan propio fraccion pa bira Presidente.
E reaccion di MEP a confirma nan cultura politico tradicional. Esnan cu e Presidente di Parlamento a beneficia haciendo maluzo di e autoridadnan cu e tin como Presidente di Parlamento, awo ta elogi’e. Pero no tin cantidad di “logro” como parlamentario cu ta hustifica maluza e poder di e funcion pa sirbi interes di bo partido. Kisas pa MEP ta normal pa laga y pusha e Presidente di Parlamento pa actua na fabor di partido. E realidad ta cu pa nos democracia funciona drechi, ta esencial pa e presidencia di Parlamento wordo eherce imparcial.
MEP ta dunando tur señal di no kier goberna si nan no por controla e Parlamento cu mester controla Gobierno. Politics as usual. Aruba, nos por miho.
