Diabierna 13 di september Conseho di Minister a reuni cu CAft unda pa prome biaha e miembro nobo pa Aruba den CAft, señor Marion Agunbero a participa. Durante e reunion, CAft a duna palabranan di elogio na Gobierno y tawata hopi impresiona cu e crecemento di e turismo na Aruba cu a conduci na e crecemento economico di e pais.
Diversificacion di Eonomia
Un punto cu CAft a subraya durante e reunion ta e vulnerabilidad di Aruba pa motibo cu ainda no a diversifica e economia suficiente. “Y nan tin rason, esey ta algo cu den e tempo nos dilanti, e gobierno despues di Gabinete Wever-Croes II, lo mester sigui traha riba dj’e. Claro cu nos tin nos plannan y vision caba si en caso nos ta e gobierno cu ta continua”, Prome Minister a menciona.
Elogio di CAft tambe riba aspecto financiero
Riba aspecto financiero tambe CAft a elogia Gobierno. E elogio tawata riba e entradanan y riba e gastonan di Gobierno pa loke ta trata gastonan di personal, esaki totalmente contrario na algun aña pasa.
Aruba ta paga mas interes compara cu Corsou
Otro punto importante cu CAft a trece dilanti ta e interes halto cu Aruba ta paga. Aruba ta paga como 300 miyon florin na interes y si compara esaki den porcentahe, e debe di Aruba awor ta rond di 75% y esun di Corsou despues di a haya kwijtschelding na aña 2010 ta na 65%. E interes cu Aruba ta paga ta alrededor di 18% di e entradanan di e pais siendo cu Corsou ta paga apenas 4% di su entradanan.
Aruba nunca a haya kwijtschelding
Esaki ta debi na e kwijtschelding, cual ta e saneamento di tur debe cu Corsou a haya na aña 2010, pero tambe debi na e interes abou cu Hulanda a duna Corsou pa tur e fiansanan despues di esey. Aruba su situacion ta diferente pasobra Aruba no tin un rijkswet y a haya Status Aparte na aña 1986 y Corsou na aña 2010 y Aruba nunca a haya kwijtschelding di niun di su debenan.
Prome Minister:
“Mi ta contento cu recientemente nos a yega na un acuerdo cu Hulanda unda den futuro Hulanda ta dispuesto pa refinancia nos debe bieu na un interes abou. P’esey nos tin cu finalisa e negosacionnan, traha hopi duro pa wanta nos finansas publico manera cu nos a bin ta gobernando ultimo tempo, y asina nos interes lo baha di 18% pa 4%. Cu esaki tur aña Gobierno por tin 200 miyon florin extra den caha pa inverti den pais Aruba y yuda esnan mas vulnerabel. Mi ta spera cu nos por logra mantene e desaroyo positivo y responsabel aki riba e tereno financiero pasobra ta asina so por logra cosnan grandi pa bo país”.
