Trata di tur manera pa nos sera bo curason pa ningun hende, y no paga cu malo cu malo.
No bay bek den bo mes pasado, ni ta poco drenta den pasado di ningun hende, pasobra Dios ta prohibi esey ( Isaias 43:18-19).
No ta pasobra bo conoce pasado di un perssona, bo tin keda corda esey pa huse contra e persona, como un kruk pa halsa bo mes y menosprecia e persona.
Semper aplica misericordia den tur cos, pasobra misericordia ta bini di Dios, y den esey nos ta demostra cu nos ta yiu di Dios.
No haci bo curason duro especialmente ora bo no tin razon, pero sea humilde, pidi despensa y arepenti pasobra e palabra di Dios ta bisa lo siguiente den Romanonan 2;5.
Ma pa motibo di bo capricho y bo curason cu no kier arepenti, bo ta montona furia pa bo mes,den e dia di furia y revelacion di e huicio husto di Dios. Kende lo paga cada ken segun su obranan.
No ta cumbini ningun hende pa biba un bida di pleito,rabia y odio, pasobra e bida ey no ta bini di Dios, pasobra rabia di hende, hopi biaha ta lanta cu orguyo pa demostra ken nan ta, y e palabra di Dios ta bisa cu rabia di hende no ta produci e husticia di Dios.( Santiago 1:20).
Laga nos no lubida, cu husticia di Dios ta keda semper den man di Dios.
Ta para scirbi; Lo mi tin misericordia di esun cu Mi tin misericordia,y lo Mi tin compasion di esun cu Mi compasion, asina ta cu no ta depende di hende cu kier ni di e hende cu ta corre,sino di Dios Kende tin misericordia.
Nunca lubida for di unda Dios a sacabo, no despresia su pordon, y su misericordia, no bay bek den maldad, inmoralidad, no haci bofon di Dios, pero den tur cos sea humilde y corda cu ta Dios a yuda bo cu awe bo ta riba pia.
No tene ningun hende abao, no rechasa ningun hende, stima tur hende, no bisa ami si no ta manera tal hende, ami ta mihor cune, pasobra esey ta pensamento orguyoso y malicia, pasobra Dios conoce tur hende su curason.
Stop di pensa malo di hende y asina mantene bo consenshi limpi, pasobra si ta e trabao cu bo ta traha, ta pone bo insinua of lanta falso testimonio contra bo prohimo, laga e trabao ey para y keda bon cu Dios. No laga ningun hende usa bo pa haci algo cu nan mes no kier haci, no consenti cu maldad.
Pesey laga nos aserca e trono di gracia cu confiansa,pa nos ricibi misericordia y haña gracia pa yuda den tempo di necesidad.
Nunca pensa cu Dios a lubida riba bo,pasobra Dios no ta lubida riba ningun hende, pero Dios ta tuma tempo, pa prepara bo pa e encargo cu e kier dunabo,y despues e ta encarga bo, pasobra cada encargo tin su preparacion.
Tene bon cuenta cu esaki: Pesey como cu nos ta ricibi un reino cu no por wordo sacudi, laga nos mustra gratitud,pa medio di cual nos por ofrece na Dios un sirbishi aceptabel cu reverencia y temor, pasobra nos Dios ta un candela consumidor.( Hebreonan 12:28).
Laga nos duna gradicimento na Señor pa Su misericordia, y pa Su Maraviyanan na e yuinan di hende. Pasobra E ta satisface e alma cu tin sed,y e alma cu tin hamber e ta yena cu loke ta bon. ( Salmo 107:8-9).
Duna gradicimento na Señor pasobra E ta bon.( Salmo 107:1).
Sinceramente, Pastor Marcel Balootje
