Caft, IMF y Banco Central di Aruba ta keda emiti rapportnan positivo riba e maneho di e finanzas publico di Gobierno. Practicamente henter oposicion ta keto riba e rapportnan aki, cu excepcion di Rycond Santos do Nascimento, cu ta confirma cu gobierno ta riba bon caminda cu su maneho.
Rapportnan ta mustrando cu debe ta bahando te na 73% di nos GDP e aña aki, tin surplus 3 aña consecutivamente, (2023-2025), desempleo ta na 4%, un cifra historicamente abao, inflacion ta na apenas 1.3% y inversionnan ta tumando lugar. Banda di esaki Gabinete Wever-Croes a sa di duna bek na pueblo tambe asina por mira con a percura pa indexering di 11.7%, pensioen a subi pa soltero cu 365 florin y pareha casa cu 536 florin den 7 aña, bijstand pa hende special a aumenta cu 130 florin, prima di AZV pe pensionado a baha cu 5.5%, reparatie toeslag pa sector priva a subi cu 50 florin y hopi mas. Mas cu claro, ora ta papia di gobernacion responsabel, cu vision y unda bienestar general ta un prioridad bo ta haya esun cu no por acepta cu Aruba ta enberdad mihor para!
Marisol a aparece diripiente cu su acusacionan di jaarrekening ta un intento desespera pa purba desacredita minister Xiomara Maduro. E splicacion di minister Maduro conoce sosten y credibilidad na tur instituto financiero; Banco Central, CAft y ARA. Ademas, Marisol intencionalmente ta ignora informacion ricibi di Algemene Rekenkamer cu recientemente tabata den Parlamento. Ta pesey semper e ta importante pa mi presenta e hechonan y realidad pa desbarata e politica dinosaurio cu e politico cu 27 aña di experencia ta hungando.
Algemene Rekenkamer Aruba a splica e tardansa riba rapport jaarrekening 2019
Algemene Rekenkamer Aruba (ARA) tabata presente 25 di April 2024 den Parlamento y a splica pakico lo tarda pa traha riba e jaarrekening 2019 cual a wordo entrega pa minister Xiomara Maduro 23 di November 2023. Den e splicacion di ARA, a pone hopi enfasis riba e hecho cu nan capacidad ta limita y pe motibo ey ta dificil pa nan haci dos investigacion pareu, y cu pesey nan a finalisa e investigacion di e rapport “Op Afstand, maar toch Dichtbij” prome cu cuminsa esun di e Jaarrekening 2019. Adicionalmente ARA a informa cu tin algun “opschoningsacties” pa por yega na un jaarrekening mas controlabel. Mirando ARA a comparti tur informacion cu Parlamento den un “Besloten Bijeenkomst,” ta frapante cu awor Marisol Tromp ta sali grita cu tardansa di Jaarrekening 2019 ta e falta di Minister Xiomara Maduro.
Caft y IMF tin comprension pa e falta di profesionalnan den e departamento di finanzas
Caft den su diferente rapportnan a cubri e tema di atraso di jaarrekening. Pesey Caft a aproba un presupuesto pa e departamento di finanzas por contrata mas profesionalnan cu lo por yuda procesa y traha e jaarrekeningnan na tempo. Notabel ta cu den e ultimo rapport di CAft di 10 di Juli 2024 riba presupuesto 2024, ta elogia Minister su maneho financiero y cu gobierno a cumpli cu tur norma acorda. Minister di Finanzas y su profesionalnan ta demostrando curashi y determinacion pa cumpli cabalmente y esaki ta keda refleha atraves di elogio, aprobacion di instancianan halto y upgrading di e rating di Aruba.
Marisol a sostene e deficitnan historico, KB, Laft y CAft
Rapportnan di Caft, presupuestonan 2013-2017, ta demostra evidencia contundente cu Marisol como presidente di Parlamento durante e gobierno di Gabinete Mike Eman, a sostene deficitnan historico cu a causa e megadebe catastrofico di nos pais. Dia cu Marisol mester a denuncia maneho catastrofico di su minister di finanzas berde, el a keda keto y bon mucha pa sigui instruccion di Mike Eman. Marisol a guli manda abao y nunca a presenta un mocion di desconfiansa contra e minister di AVP pa kite di trabao! Awe cu presupuestonan ta entrega na tempo, ta cumpli cu tur normanan di Caft, tin surplus pa paga e debe, gobierno ta dunando bek na pueblo, inversionan di decenas di proyecto ta tumando lugar, awo Marisol kier grita cu cos ta malo. Pregunta na bo ta, bo ta kere cu e politico aki tin Aruba na su curason di berdad?
