Un mensahe pa tur hoben.
No laga ningun hende gañabo, no laga ningun hende strobabo, no laga hende bisa bo cu no por pasobra pa Dios nada ta imposibel, locual ta imposibel pa hende ta posibel pa Dios.
Caminda hende ta bisa no cu nan no por, Dios su contesta ta si Mi por.
E spirito di desanimo ta halto pasobra e enemigo sa bon cu si un hende tin Fe, e lo logra sali padilanti pasobra Fe ta move man di Dios y duda ta e gran ladron di bendicion.
Dios ta apoya tur bon plan cu ta den boluntad di Dios, si bo plan ta limpi y puro, sin nada scondi den manga di camisa, sin maldad acumula, sin plan pa perhudica otro hende bo por conta cu apoyo di Dios,pasobra Dios no ta participa , ni tampoco apoya maldad. Ora hende ta haci malo ta riba nan mes forsa y cu apoyo di diabel nan ta hacie.
Tur hoben mester tin Fe , pasobra ta deber di mayor pa sembra Fe den nan yuinan, y saca e mucha for di duda, siña e mucha pa esforsa su mes den tur locual cu ta bon especialmente su educacion na cas y su enseñansa na scol, pa asina e por logra su proposito den bida.
Ta deber di mayor pa sembra Fe den nan yiu, pasobra tur cos no ta paña y sapato di marca, ni tampoco duna placa pa sali tur siman, pasobra ta Fe un hoben mester tin den Dios, pa vence tur e presionnan di e enemigo.
Locual hobennan ta pasando aden awendia no por wordo soluciona cu orguyo y materialismo. E hoben mester wordo yena cu amor y Fe.
Hoben cu no ricibi e apoyo di palabra di Dios den cas, cu ta produci Fe, hopi biaha ta cay na caminda, entre otro ta rebeldia y stop di bay scol, despues ta cuminsa hala garoshi den supermarket y cay bao di mal influencia, cuminsa huma sigaria, despues bay pa e droga y na final termina cu arma di candela den man atracando of intenta pa mata otro.
Laga nos hala serca cu un curason sincero,yen di siguransa di Fe,cu nos curason purifica di un mal consenshi,y nos curpa laba cu awa puro. Laga nos tene firme na e confesion di nos speransa sin basila,pasobra Esun cu a priminti ta fiel.La ga nis considera con pa stimula otro pa stima y haci bon obra.(Hebreonan 10:22-24).
Un palabra di encurashamento na tur hoben: Pesey no tira boso confiansa afo, cual tin un gran recompensa. Pasobra boso tin mester di perserverancia, pa ora boso haci e boluntad di Dios, boso ricibi loke a wordo priminti.( Hebreonan 10:35).
No ta tur locual ta lombra ta oro, tin hopi caminda cu ta parce bon y bunita, pero cu ta hiba na perdicion, tin hopi hende cu a pensa cu nan por caba cu alcohol, pero alcohol a caba cu nan, tin hopi a pensa cu nan lo bira rico cu droga, pero ki bal la pena bo ta rico, y bo ta biba constantemente bao di menasa of sera den prison y desconfia cu anochi bo no por drumi.
Ora nos ta pidi algo na Dios, cu ta den Su boluntad, pa haci bon pa nos mes y tambe pa otro hende, nos ta carga e garantia cu Dios ta aproba nos peticion.
Pa Dios nada no ta grandi, tampoco nada ta imposibel.
Sin Fe ta imposibel pa agrada Dios.( Hebreonan 11:6).
Laga nos gradici Dios sin ningun duda,pasobra esun cu ta duda no por ricibi.
Sinceramente, Pastor Marcel Balootje
