Ta cumbini y ta di gran beneficio pa nos , ora nos ta hiba un bida cu ta agrada Dios.
Na prome lugar nos lo tin pas interno, pasobra esey ta necesario tur momento, pa pensamento corecto y positivo goberna nos mente..
Pasobra e pas di Dios cu ta surpasa tur comprendemento, lo warda boso curason y boso mente den Cristo Hesus.( Filipensenan 4:7).
Den Proverbionan 19:7 palabra di Dios ta bisa nos: Ora cu un hende su caminda ta agrada Señor, E ta pone hasta su enemigonan keda na pas cune.
Ora nos bida ta agrada Dios, nos tin proteccion divino di Dios: E temor di Señor ta conduci na bida, asina cu un hende por drumi trankil, sin miedo di maldad.( Proverbionan 19:23)
Pasobra e a stima Mi pesey lo Mi libre , lo Mi protehe, pasobra e conoce Mi nomber, Cu bida largo lo Mi satisface y laga e mira Mi salbacion.( Salmo 91:14-16).
Ta bendicion hopi grandi tin pa nos bida ora nos bida ta agrada Dios.
Y sin Fe ta imposibel pa agrada Dios,pasobra esun cu ta bini serca Dios,mester kere cu E ta Esun cu ta recompensa esnan cu ta busk’E.( Hebreonan 11:6).
Y nos ta pidi boso pa cana na un manera digno di Señor, pa agrade den tur sentido, dunando fruta den tur bon obra y creciendo den conocemento di Dios, siendo fortifica den Su poder, segun Su forsa glorioso,pa haña tur perserverancia y pasenshi.( Colosensenan 1:10-11).
Door di dj’E laga nos ofrece continuamente un sacrificio di alabansa na Dios,esta fruta di lipnan cu ta duna gradicimento na Su nomber, Y no laga di haci bon y di comparti cu otro, pasobra sorto di sacrificionan asina ta agrada Dios.(Hebreonan 13:15-16).
Un parti hopi esencial di nos integridad, ta e bida cu ta agrada Dios, pasobra ora nos ta agrada Dios, e ta haci nos caminda liber di tropieso di pica, materialiasmo, y inmoralidad.
Tur hende cu nan bida ta agrada Dios, ta crece den tur area di nan bida, pasobra e gracia y e favor di Dios ta pushanan pa yega na exito.
Un bida cu ta agrada Dios, ta hiba nos na un sometemento total na Dios, caminda Dios tin e prioridad maximo, y Dios ta goberna nos bida y di eynan e crecemento Spiritual tan anhela ta bini, nos discernimiento lo aumenta, pasobra e frutanan di Spirito santo lo duna mas claridad den nos bida dia tras dia.
Confia den Señor cu henter bo curason, y no depende riba bo mes comprendemento. Den tur bo camindanan reconoce y E lo dirigi bo berehanan.( Proverbionan 3:5-6).
Ora nos bida ta agrada Dios e palabra ta cumpli den nos bisando: Laga boso lus briya dilanti di hende di tal manera, cu nan por mira boso bon obranan y glorifica boso Tata cu ta den cielo.( Mateo 5:16).
Ta bon pa nos exhorta nos hubentud, y coregi nan den amor, y siña nan con pa laga nan bida ta agrada Dios, pasobra canando leu for di e caminda di Dios, nos hubentud ta confronta dia tras dia cosnan dificil, y trampa di e enemigo cu sin guiansa den e palabra di Dios nan ta trompica.
Nos tur por mira locual ta para scirbi den Proverbionan 16:7 y esey por ta locual nos hubentud mester pa sali for di rabia, odio, y falta di pordon, especialmente ora ta trata di asunto di gang.
Señor ta hiba gusto den esnan cu ta tem’E, den esnan cu ta spera riba Su misericordia.( Salmo 147:11).
Nos bida mester agrada Dios.
Sinceramente, Pastor Marcel Balootje
