Falta algun ora solamente pa Aruba por experiencia su prome conferencia cultural y creativo! CreActivo Conference 2024 ta bay tuma luga dia 8 y 9 di oktober 2024, na Renaissance Convention Center! CreActivo 2024 ta e conferencia caminda abo artista, ser creativo, visionario y lider por conecta y wordo inspira door di personanan dinamico y briyante den nos Industrianan Cultural y Creativo.
Kico ta bay pasa durante e Conferencia?
Durante dos dia lo bay tin un variedad di actividadnan, sesionnan y tambe presentacionnan di diferente oradornan internacional y tambe local:
- Dia Uno: Ta e dia pa wordo inspira door di nos oradornan manera Ronella Croes, Clara Reyes, John Howkins y tambe experencia e storia y exito di nos artistanan y sernan creativo local.
- Dia Dos: Nos lo “blow your mind” cu oradornan manera John King, Felipe Buitrago Restrepo y diferente otro oradornan local. Topiconan poderoso lo wordo trata y dialoga.
Un tiki di nos oradornan internacional:
John Howkins, cu ta wordo considera como e “tata di e economia creativo”, ta un lider strategico den e area di creatividad y innovacion. Reconoci pa su bukinan influencial: “The Creative Economy” (2001), “Creative Ecologies” (2006) y “Invisible Work” (2020).
Su experticio ta enfoca ariba exploracion di nos futuro di trabounan laboral y AI of Inteligencia Artifical, caminda el a comparti su experticio y conocemento cu mas di 30 pais mundialmente, entre otro na Inglatera, Australia, Sur Korea, Brazil, China, Singapore, Merca y mas. Cu un carera cu ta inclui publicacionnan, TV, film, y media digital, Howkins tin un rol importante den medianan manera HBO, Time Warner y otro companianan di media entre otro CREATEC, Tornado y BOP Consulting.
Felipe Buitrago Restrepo, un lider experto den e sector di Cultura y Economia Creativo y Information & Communications Technology, cu mas di 22 aña di experiencia.
Como ex-Minister di Cultura di Colombia bao di ex-Presidente Iván Duque, e tin un rol crucial den maneho publico. Buitrago tambe ta e co-autor di “The Orange Economy: An Infinite Opportunity” y “Orange Economy: An Infinite Reality “ hunto cu ex-Presidente Iván Duque. Tambe el a colabora den “The No Collar Economy” hunto cu Sam George.
Su trabounan extensivo den investigacionnan y maneho publico pa cu Cultura, Creatividad y Innovacion ta sumamente importante pa economia creativo den su totalidad.
John King, ta e Minister di Economia Creativo, Cultura y Deporte na Barbados desde aña 2018 bao di Prome Minister Mia Mottley. Su liderazgo y maneho a hunga un rol fundamental den e avance di e Industria Creativo di su pais, integrando arte, cultura y deporte den e economia nacional. King a realisa iniciativanan manera Crop Over y a demostra su sosten valioso na artistanan y sernam creativo local cu entre otro subsidio y a fortifica e identidad cultural di Barbados, posicionando e pais como un lider den economia cultural y creativo, pues e “Orange Economy”.
Clara Reyes, ta directora di e Departmento di Cultura di Ministerio di Educacion, Cultura, Hoben y Deporte na St. Maarten. Como un defensor prominente di cultura, artista, y educador, Reyes ta dedica na perserva cultura di Caribe cu su trabou den danza, teatro, y herencia cultural. Como co-fundador y Director di e National Institute of Arts (NIA), e tin un rol crucial den e formacion di e panorama cultural den nos region Caribe y ta aporta na e sosten di tur artista caribense.
Elton Villarreal, ta un trainer internacional nativo di Corsou, conoci pa su experticio den “leadership development” y tambe educacion experencial. Den su carera e ta train personanan individual y organisacionnan grandi globalmente na paisnan manera Bolivia te cu Japon. Villarreal ta reconoci mundialmente pa su trabounan den dialogo democratico y resolucion di conflicto. Villarreal ta un facilitador y mentor pa hobennan, artistanan, sernan creativo y lidernan den comunidad y su meta ta pa sigui engrandece cada persona su habilidadnan y confiansa den su mes a traves di workshops y coaching.
Nos oradornan local:
Esnan cu lo presenta y contribui cu nan ideanan y motivacionan pa e desaroyo di nos Industrianan Cultural y Creativo ta entre otro, Arthur Loefstok y Edjean Semeleer di Fundacion Go Cultura cu lo pone enfasis riba e importancia y potencial di formalisa y desaroya e industrianan aki pa Aruba. Tambe Ronella Croes y Derchlien Dijkhoff di Aruba Tourism Authority cu lo splica dicon e ta esencial pa e Industria di Turismo asisti y apoya den desaroyo di un industria nobo y cu hopi potencial pa nos isla. Otro bosnan local lo ta Mary-Ann Falconi Rasmijn di Impact Hub, cu lo enfoca riba e balor di data y evidencia pa crea strategia di desaroyo, empoderamento y transformacion danki na e industrianan aki. Daniel Tecklenborg di CEDE Aruba lo enfoca riba e potencial di e industrianan aki pa transformacion social. Cherryldine Buckley di SMAC lo enfoca riba e impacto di nos carnaval. Tambe varios ser creativo exitoso lo ricibi un spotlight y hopi mas!
Cumpra bo ticket!
Ticket ta disponibel via nos website gocultura.org/CreActivo. Un 1-day-pass cu ta inclui desayuno, lunch y refreshments durante henter e conferencia, ta costa $100 pa persona, un two-day pass ta costa $175. Tambe nos ta ofrece digital-pass pa por tin acceso na e transmicion en bibo cu ta costa $65 pa cada dia.
Fundacion Go Cultura ta gradici nos partnernan Aruba Tourism Authority, AHATA, Setar NV, Departamento di Cultura Aruba, CEDE Aruba, Aruba Airport Authority, Ministerio di Asuntonan Economico, Comunicacion y Desaroyo Sostenibel, Ministerio di Transporte, Integridad, Naturalesa y Asunto di Adultonan Mayor, Minister di Cultura y nos “one and only” Ronchi de Cuba pa sostene e gran evento pa asina sigui engradece nos Industrianan Cultural y Creativo.
Pa mas informacion, contacta Fundacion Go Cultura na +297-5649525, via e-mail na info@gocultura.org of bishita gocultura.org. Join nos na e Conferencia CreActivo 2024 pa un experiencia inolvidabel di creatividad y conexion global!
Fundacion Go Cultura
Tel: +297-5649525, E-mail: info@gocultura.org, Website: gocultura.org
