*** Acusacion contra Glenbert ta parce un otro charada manera e carta falso di BCI den caso di Otmar
Den un estado di derecho, husticia mester ta imparcial, solido y basa riba hecho concreto. No por tin espacio pa manipulacion politico of duda rasonabel den e accionnan di un institucion tan esencial manera e Ministerio Publico. Sinembargo, den e ultimo añanan, ta surgi preocupacion si ta respetando e regla aki na Aruba.
E Ministerio Publico, cu ta un pilar di husticia, ta den e centro di cuestionamento for di e caso polemico di Otmar Oduber, unda nan a basa nan mes riba un carta di siete punto emiti pa departamento di polis BCI. E carta ey a resulta un charada, sin ningun substancia real, y a lanta duda serio tocante e credibilidad di e investigacion y e trabao di e departamento aki encuestion. Siete punto totalmente basa riba mentira. Otmar Oduber a desbarata e carta falso di BCI na varios ocacion.
For di e momentonan ey, a cuminza un sintimento di actuacion arbitriario di Ministerio Publico. Awor, e duda aki a regresa cu forsa den e caso di Glenbert Croes. Croes, cu a mantene su inocencia for di e prome momento, no a duna ningun indicacion di ta envolvi den actividadnan corupto. Pero, e patron ta parce ta ripiti: un persona ta deteni y su reputacion ta mancha sin tin pruebanan contundente of concreto ariba mesa.
Kiko ta pasando realmente? E pregunta cu hopi hende ta hasi ta preocupante: Ta usa Ministerio Publico como un instrumento den weganan politico? Nan ta detene, encarcela y desprestigia figura publico sin base solido, mescos cu a pasa cu e carta sin base di BCI? E Ministerio Publico mester actua cu riguroso y cu cautela, especialmente ora cu ta trata di investiga funccionarionan halto. No por permiti cu investigacionnan bira un heksenjacht, unda ta haci hende sospecha of ta trece acusacion, sin prueba concreto, cu ta destrui bida y carrera di un persona. Detene un hende sin un acusacion bon funda no solamente ta irresponsabel, pero tambe ta atenta contra e integridad di e sistema di husticia y ta mina e confianza di cuidadanonan den nan institucion.
Y awor ken ta controla? Ken ta controla e Ministerio Publico? Esaki ta e wega wega den e arena politico? Si asina ta, nos ta enfrenta un problema serio, unda husticia ta bira un arma pa daña reputacionnan sin prueba concreto. Nos kier husticia, si, pero un husticia autentico. No un cu ta mancha, humiya of encarcela hende sin evidencianan solido. Husticia mester ta ciego, no usa pa meta skur of interesnan personal. E pueblo ta exigi claridad y transparencia, y ta spera cu e institucionnan actua cu e seriedad y responsabilidad cu e cargo ta exigi.
Algun siman pasa Glenbert Croes a asegura SOLO DI PUEBLO, cu e tin mucho experiencia den politica, y no ta presta su mes pa accepta soborno ni wordo soborna. El’a para riba cu e ta inocente.
Tempo y e proceso lo mester trece claridad den e caso aki.
