Diaranson anochi den un cede completamente yen y acompaña pa famia y amistadnan, Partido Movimiento Electoral di Pueblo MEP a lansa Aldrin Lampe como candidato nobo riba lista pa eleccion benidero.
Aldrin, yiu di señor Mirto Lampe, y señora Lorena Lampe, ta un hoben di 29 aña, cu a crece den e bario di Papilon. Despues di a termina su VWO na Aruba, Aldrin a tuma e decision di subi avion rumbo pa Hulanda pa asina sigui cu su estudio. Na Radboud Universiteit na Nijmegen, el a studia Economie en Bedrijfseconomie cu specialisacion den finansas. Aparte di esaki, el a haci un “minor” den economia y derecho fiscaal, y “international management, negotiation and peacemaking”.
Durante e tempo cu el a biba na Hulanda, Aldrin a conoce su pareha Dyanne Timmermans cu ken awe e tin dos yiu, un mucha muhe di 5 aña y un mucha homber di 2 aña. Aldrin ta un persona hopi familiar, cu ta disfruta di pasa tempo cu su famia. E ta gusta deporte, e ta core, e ta dedica tempo na su team di futbol Estrella division di honor, y ta train e muchanan di Alpharunners. Recientemente el a forma parti di e Fundacion Beyound Sports Limit Foundation, cu ta un fundacion cu ta stimula e aceptacion y inclusion di atletanan special den diferente deporte.
Actualmente Aldrin ta laborando na SVB. El a a cuminsa como “projectmedewerker” y despues a bira “risicomedewerker”. Den su 4 añanan na SVB el a haya e oportunidad pa sigui diferente curso y tambe haci un estudio den siguridad social unda el a obtene su diploma den Tecnica Actuarial pa Seguridad Social.
“Mi a subi lista di MEP pa representa e ‘young professionals’ y e futuro ‘young professionals’.
Postulando mi mes den e arena politico, mi kier demostra nos hobennan cu si nos kier mira innovacion, evolucion y cambionan positivo den politica y otro areanan, nos tin cu tuma e curashi “to make our voice be heard”. Nos tin cu dal un stap padilanti y demostra cu nos tambe tin e capacidad pa por yuda hiba Aruba dilanti. No sinta warda pa otro hende trece e cambionan. ‘Be the change you wish to see on the island’”Aldrin a expresa.
Lider di Partido Evelyn Wever-Croes na su turno a gradici Aldrin pa acepta e reto di subi Partido MEP pa asina reprenta nos young professionals . El a indica cu Partido MEP ta un famia fuerte y resiliente cu semper tey pa otro. “Mi ta desea bo hopi forsa pa cu e reto nobo aki y gradici bo pa acepta pa uni na e famia di MEP pa eleccion benidero”, Lider di partido e expresa.
