Diabierna anochi na Cede di MEP na Sta.Cruz, dilanti un multitud di sostenedor, partido Movimiento Electoral di Pueblo MEP a introduci oficialmente e 29 candidatonan cu lo representa partido MEP pa eleccion dia 6 di december binidero.
Despues di a pasa un bunita video na unda un miembro di famia di cada candidato a describi un poco di e personalidad di e candidato, a yama padilanti lider di partido Evelyn Wever-Croes. Cu hopi emocion lider di partido a expresa di ta sumamente agradeci di mira e sosten cu partido MEP tin di comunidad. El a indica cu e mainta aki, acompaña pa un multitud grandi di persona, el a entrega cu hopi orguyo, e lista victorioso di partido MEP pa elecion 2024.
Lider di partido a expresa di tin e honor di lidera 28 hende muhe y hende homber cu tin curashi, y determinacion pa lidera pais Aruba. Hunto nan ta representa cada segmento y region di nos pais. El a sigui splica cu awendia pa tuma e decision di drenta arena politica no ta uno facil, pero ta sumamente orguyoso di tin e candidatonan aki cu ta balente y sin miedo pa representa cada un di nos.
“Y nos tur sa cu unabes nos pone Dios nos dilanti, nada no por bay robes. Tambe nos sa cu ora bo intencionnan ta honesto y nan ta cu e pueblo en general, ta cosnan grandi bo ta logra.
Danki na nos fundador, nos lider inmortal, nos libertador Betico Croes cu a lucha pa nos Status Aparte, awe nos ta biba den un pais liber. Despues nos lider honorario a gara e bandera pa sigui cu e lucha, señor Nelson Orlando Oduber a sa di goberna e pais aki 4 biaha na forma ehemplar y a logra scrap e fecha independencia pa nos sigui biba den libertad.
Durante e ultimo 7 añanan aki, a toca ami e honor di lidera e gobiernonan. Inspira pa tur e lidernan di pasado, tur e candidatonan y tambe tur esnan cu ta lucha hunto cu nos, a pone cu ora retonan grandi a bati na nos porta, manera e pandemia di covid, nos no a entrega sino traha mas duro pa pone Aruba bek riba e caminda di progreso y bienestar.
Danki na Xiomara Maduro pa e bon maneho financiero, na Dangui Oduber pa su vision pa cu turismo, na Glenbert Croes pa un porcentahe di desempleo mas abou, na Endy Croes pa trece trankilidad den enseñansa y hopi inversion den deporte, y na Rocco Tjon pa haci Aruba un isla mas sigur. Tambe un danki na tur e parlamentarionan di MEP cu den parlamento a bringa y lucha pa controla gobierno y trece respet den e organo mas halto di pais Aruba.
Gabinete Wever-Croes a haci hopi pa pais Aruba, pero lamentabelmente no a logra finalisa e trabou. P’esey humildemente e ekipo di MEP lidera pa mi persona, ta pidi cada un di boso pa duna nos boso sosten den e proximo eleccion dia 6 di december, pa asina nos por completa cu e trabou cu nos a bin ta haciendo”, Lider di partido a expresa.
