Rudy Richardson, candidato di partido PPA despues di e reunion cu nan como partido tabatin cu San Nicolas Business Association a bisa cu e tabata un reunion sumamente constructivo.
El a indica cu pa hopi aña el a bin ta lucha pa cambia e panorama di San Nicolas y e stakeholder cu ta yuda guia e maneho di gobierno ta sigur SNBA. Durante e reunion a papia riba diferente rapport cu a wordo traha tempo Otmar Oduber tabata forma parti di gobierno anterior, pero cu lamentablemente tur esfuerso cu Richardson a bin ta haci di 2017 bin ariba, ainda tin e mesun issues, cual nan ta e problemanan di recidivista, depresion economico, social, entre otro.
“E issues aki a keda despues di basicamente 10 aña di gobernacion y tur esaki a conduci cu mi no ta forma parti mas di e organisacion politico di pasado. E capitulo ey a cera siman pasa diabierna y un capitulo nobo a habri e weekend cu a pasa. Awo mi ta forma parti di Partido Patriotico di Aruba y den e vision cu nos tin, e plan cu nos tin, Plan Nos Aruba 2025-2050, e vision long term, sigur sigur, San Nicolas ta central den e desaroyo macro-economico di Aruba den su totalidad”, ta palabranan di Rudy Richardson.
Pesey e ta di acuerdo cu su lider, Otmar Oduber cu ta bisa cu e topico di refineria mester pasa pa pasado, cu mester desaroya San Nicolas Port Authority, desaroya un ambiente unda ta haya acceso na lama, mester traha e infrastructura pa e hotel Secrets cu ta na caminda pa mas tarda maart 2025.
Riba e ultimo punto Rudy ta agrega cu awe no ta mira e infrastructura pa carga e proyecto aki cu ta un inversion di 270 miyon Dollar cu ta casi equivalente na un crecemento di GDP di 11% cu un posibel refineria lo por a trece na e parti aki di Aruba.
E ta considera cu e reunion cu SNBA tabata uno hopi fructifero, pero cu naturalmente tin hopi pa haci ainda y pesey lo campaña duro como PPA pa e partido por bolbe den gobernacion y ehecuta nan vision a plaso largo di e Plan Nos Aruba 2025-2050, pero cu lo break e down y den prome 4 añanan: no lo tin mas refineria, infrastructura adecua pa sostene e hotel cu ta bou construccion actualmente y desaroya San Nicolas Port Authority, creando otro desaroyo macro. “E spin off effect lo bay ta uno increibel pa nos hendenan, nos ta bay focus awo pa calidad, nos kier aumenta e calidad di bida di nos conciudadanonan. Nos no kier promesnan basi of smokescreens, tin plannan concreto caba, tin rapportnan concreto caba y awo ta ora pa ehecutanan cu sosten di nos pueblo”, Rudy Richardson a finalisa.
