Despues di a constata cuanto partido lo participa den e siguiente eleccion, ta surgi e pregunta di cantidad versus calidad. E cantidad di e partidonan lo eleva e calidad cu política y vooral gobernacion lo wordo hiba riba nos Isla? E pregunta ta di sumo importancia pasobra e contesta lo determina si ta vale la pena pa bay vota. Un ehempel ta e partido cu mi ta co-fundador. E no a logra e cantidad di firma pa participa. Mi mester remarca cu siman pasa mi a scucha un declaracion di e lider actual cu a pone e fundeshi di UPP sacudi ora ela declara cu un ilegal cu wordo gara ta traha mester lag’e keto! Esaki pami no ta acceptable sin cumi kier bay den detaye.
Algun siman pasa mi a saca un articulo na unda mi a vocifera mi preocupacion pa cu e rumbo cu politica ta desaroyando. Mi ta constata cu tin masha hopi oportunismo cu lo percura pa *cannibalismo”, fiesta na grandi, tuma lugar. Mi a ilustra kico esaki kiermen pa e nivel di gobernacion cu nos lo bay haya despues di 6 di december.
Bulamento di cura sin splicacion a bira normal. Hende cu a perde trabou pa motibo di buracheria na trabou ta cambia di partido y bay hustamente pa un di e politiconan mas corupto cu Aruba a conoce. Otro ta bay riba lista despues cu ela haya decena di permiso. Partidonan grandi tabata tin problema pa haya 29 candidato y djis pone hende riba lista pa yena e lista.
Promesanan na granel sin bisa un solo palabra con ta bay hasi’e. Permisonan pa “cheap laborers” ta wordo duna sin pensa dos biaha. E tsunami di mas di un miyon venezolano na Peru ta causando problema grandisimo. Sin papia di e entrega di nos autonomia pa motibo di mal gobernacion cu nos conoce desde 2009.
P’esey e pregunta grandi y cardinal ta: “lo bin cambio real” despues di dia 6 di december? Ta vale la pena pa bay vota? Ta mustra cu hopi hende lo bai keda sin vota demostrando asina nan desaprobacion di e cannibalismo cu a hasi su entradat den politica na Aruba.
Motibonan pakiko mi a tuma un decision pa stop. Pero un frase di dr. Martin Luther King ta mane core den mi sinti, cu ta bisa algo asina: *”Dia nos keda keto riba cosnan importante, nos bida lo cuminsa caba!”*
