Hopi mayor lo por contesta con mi por sa? E por bisami e ta bay tal caminda, pero ora e sali e ta bay otro caminda.
Si y hopi di nan tin razon, pasobra amor y sinceridad, pa hopi tempo caba a wordo horta for di hubentud, y poco poco mayornan a bin ripara cu amor y sinceridad ta bini for di cas.
E tempo cu tabata wordo inverti den muchanan antes, awor aki a bira un tempo caro, y hopi biaha esey ta notable den bida di e mucha, ora nos wak su comportacion, y actitud rebelde.
Hopi hende ta criando yiunan digital, cu ta ricibi mensahe for di telefon tur dia, y cu e mayor mes ta trahando dos trabao, of hopi biaha tin un bida, cu no ta un bon testimonio pa e mucha.
Nos ta bibando den un tempo trabahoso den cual costo di bida, ta subiendo mescos cu e solo cu ta kima tur dia, y cu ningun hende no tin un solucion pe.
Mayor ta sali di trabao bay gym, sin tene cuenta con situacion ta na cas,
Mayor cu ta traha warda ta acepta di nan hefe, ora nan a subi 7 pa 3 y e hefe bin pidi pa keda te cu 11 anochi sin tene cuenta cu e falta cu nan ta haci na cas, pero ta mas importante e placa cu ta bin den saco.
E relacion entre mayor y yiu mester ta hopi balora ,e mester ta a base di puro confiansa, pasobra e dianan ta malo.
Un mucha mester obedece su mayor, pasobra na prome lugar esey ta mandato di Dios, pa tur yiu honra nan tata y nan mama.
Pero e mayor tambe mester pone tempo personalmente pa su yiu, pasobra pa falta di tempo y atencion, e enemigo ta cohe ventaha den bida di un hoben.
Na prome lugar e berdad di e palabra di Dios, mester ta conoci den bida di un mucha, y esey ta su mayornan tin cu haci esey.
Na di dos lugar , e bida di e mayor, mester ta un testimonio pa e yiu, e bida di e mayor ta e prome ehempel pa e yiu sigi, pasobra mayornan ta mentornan estableci pa Dios.
E amor y sinceridad di mayor ta e fuente di dependencia su yuinan, mas amor y sinceridad tin den un hogar,mas hoben dinamico y integro nos lo tin den sociedad.
No stima mundo y e cosnan cu tin den mundo. Si un hende ta stima mundo, e amor di e Tata no ta den dje. Pasobra tur loke tin den e mundo,e deseo di carni,y e deseo di wowo,y e orguyo di bida,no ta bini di e Tata, sino di e mundo. Y e mundo ta pasa bay y su deseonan tambe, ma esun cu ta haci e boluntad di Dios ta permanece, pa semper.( 1Juan 2;15-17).
Deseonan di carni no ta solamente tocante bida sexual, pero ta contene tur locual ta inmoralidad cu por daña bida di hende, y tambe cosnan ilegal manera uso di droga. Y locual ta domina nos hubentud awendia cual ta buracheria.
Si nos tene cuenta con bebemento a aumenta bao di nos hubentud,nos tin cu bisa cu e ta alarmante, ya no tin edad pa bebemento mas, parce manera tur dia ley ta wordo kibra y alcohol ta wordo bendi na nos hubentud, pasobra hende no ta tene cuenta cu edad, benta ta benta, y no ta importa consecuencia.
Ban cubri nos yuinan bao di oracion tur momento.
Sinceramente, Pastor Marcel Balootje
