Siman pasa dia 1 di november Prome Minister Evelyn Wever-Croes Y Minister Rocco Tjon tawata presente pa e inauguracion di e oficina nobo di Departamento di Mucha y Hoben. DMH ta un departamento cu e meta pa garantisa siguridad di nos muchanan y hobennan a traves di varios proyecto, entre otro codigo di proteccion, toolkit digital y opleiding pa tur profesionalnan den e veld. Adicional DMH ta e motor tras di e ley di “creche” cu a wordo aproba algun tempo atras, y ta traha di cerca cu tur creche na Aruba.
Departamento di Mucha y Hoben a bira un realidad dia 1 di october 2022. Despues di casi 2 aña di trabou intensivo riba rapport di formacion, pa implementa di un manera efectivo y eficiente e Tratadonan Internacional di Derecho di Mucha como tambe e Landsverordering (LV) Kinderopvang, gobierno a dicidi pa crea un entidad: Departamento di Mucha y Hoben, DMH.
DMH tawata forma parti di e Sociaal Crisis Plan cu a inicia na fin di 2018, bou di mandato di ex Minister Glenbert Croes durante Gabinete Wever Croes I y a keda concretisa bou di mandato di Minister Rocco Tjon y Gabinete Wever Croes II. Esaki tawata den cooperacion y colaboracion cu 20 diferente socio riba un total di 31 proyecto, cu e meta principal pa mehora y reinforsa e sistema nacional di proteccion di nos muchanan y hobennan.
“Mi ta felicita e team cu a haci esaki posibel. E motor tras di e proyecto aki Señora Sue-ann Ras, y specialmente mi ta gradici colega Rocco Tjon pa su vision y compromiso cu bienestar di nos muchanan, y su determinacion pa a contunua cu e vision di ex Minister Glenbert Croes. A traves di e proyecto aki nos muchanan ta haya e proteccion y atencion necesario cu tur mucha y hoben ta busca di adultonan. Awor ta keda na nos como adulto pa duna di nos banda, duna nos compromiso cu nos ta bay cuida y proteha nos muchanan. Pabien Aruba!”, Prome Minister a expresa.
