ACCION21 a presenta nan vision na ATIA pa rebaha costo di bida na Aruba

Miguel Mansur, parlamentario y lider visionario di ACCION21 a tene un encuentro strategico cu Herrick Henriquez, Director di Aruba Trade and Industry Association (ATIA) e siman cu a pasa. Durante e reunion importante aki, Mansur a comparti su vision pa un Aruba cu costo di bida mas abao y economicamente vibrante cu ta beneficia tanto ciudadanonan y tambe comercio. E sugerencianan di Mansur, cual ta enfoca riba baha costo di bida y stimula crecemento economico, tin como meta pa crea un ambiente mas inclusivo y prospero pa negoshinan na Aruba.

Mansur su combersacion cu ATIA a enfatisa e nesesidad pa un reforma completo den sistema di impuesto y economia di Aruba, cu tin como meta pa desaroya un pais unda tanto entrepreneur, doño di negoshi chikito y compania grandi por florece hunto cu e ciudadano Arubano. “Un Aruba prospero ta un pais unda cada residente y negoshi por disfruta di seguridad financiero, mas oportunidadnan, y un miho calidad di bida,” Mansur ta expresa.

Vision pa un economia sostenibel, competitivo, y cu costonan reduci
E vision di politica di ACCION21 ta envolve un cambio total den sistema di impuesto actual, cu Mansur ta kere cu lo bay contribui pa baha e costo di bida pa ciudadano y pa haci Aruba mas competitivo como un destinacion pa comercio. E plan di Mansur ta enfoca riba e siguiente puntonan di atencion:

• Rediseña e sistema di impuesto eliminando varios impuesto y levinan, manera BBO/BAZV/BAVP, Derechonan di Importacion, Impuesto di Turismo, Impuesto Ambiental, Impuesto pa huur di auto, Impuesto di Gaming, Deviezen Commissie, y Impuesto di Transferencia. cu simplificacion di e structura di impuesto y adopta un impuesto no acumulativo manera BTW y pasa pa un sistema di impuesto teritorial, Mansur ta visualisa un sistema mas husto cu ta baha e carga financiero riba tanto individuanan y comerciantenan.
• Elimina Impuesto di Ingreso, pa pone mas entrada financiero directo den man di ciudadano y doño di negoshi. Mansur a argumenta cu aumentando e capacidad di gasta, Aruba lo mira un stimulacion den comercio local. Pasobra e residente lo tin mas capacidad pa gasta riba productonan y servicio. E cambio aki lo stimula demanda, aumenta productividad, y eventualmente crea mas trabou mientras e ta converti nos pais den un duty-free port. 
• Elimina e impuesto riba number di auto ta un punto cual Mansur ta kere lo hiba na mas eficiencia mirando cu por hisa accijns algun cen pa saca e mesun suma. Tempo ta valioso y e sistema actual cu tur doño di auto mester paga impuesto riba number di auto tur aña ta ineficiente. Incorpora e suma den accijns ta mas husto ya cu esnan cu lo haci mas uso di nan vehiculo lo paga mas y curasha transicion pa auto electrico.

Empoderando comercio pa medio di reforma financiero
Otro elemento clave den e vision di Mansur ta e reformacion di e paisahe financiero di Aruba. Mansur ta mira e potencial pa Aruba den desaroya un mercado di capital local fuerte cu lo stima e crecemento di economia y atrae mas inversion. Pa logra esaki, e parlamentario ta propone un reforma strategico di Banco Central di Aruba y e desaroyo di un mercado di capital local, un ‘Aruba Stock Exchange.’

Haciendo esaki na Aruba lo habri oportunidadnan nobo pa industria financiero y aumenta acceso na capital. “Cu un Aruba Stock Exchange, nos por inspira innovacion y stimula diversificacion di nos economia, permitiendo negoshinan local pa crece, competi, y logra exito na un nivel mas halto,” Mansur ta expresa.

Un Aruba prospero pa tur persona
E vision completo di Mansur pa reforma economico ta resalta su compromiso pa crea un Aruba unda ciudadano y negoshinan por ta prospero di berdad. ACCION21 ta haya cu ora bo traha pa baha costo y crea un sistema financiero mas simpel y accesibel, Aruba por experiencia un economia mas fuerte y mas resiliente cu nunca. E reunion cu ATIA ta marca un paso significativo pa realisa e mision di ACCION21 den stimula cambionan positivo riba e isla.

E dialogo entre Mansur y Henriquez tabata productivo y yen di speransa, señalando un posibel colaboracion pa construi un Aruba cu ta balansa e interes di su hende y su comunidad di empresario. Hunto, nan ta visualisa un futuro unda tur hende—residente, entrepreneurnan, y comerciantenan—tin un chens pa prospera den un Aruba mas competitivo, innovativo, y financieramente vibrante.