Diabierna ultimo, dia 1 november 2024, Departamento di Mucha y Hoben (DMH) a inaugura su localidad oficialmente den presencia di diferente stakeholders local y internacional. Durante un atardi hopi ameno y agradabel, DMH a invita tur su stakeholdersnan cu ta traha cu nan desde 2022, pa asina por bin presencia nan localidad nobo y recapitula e logronan di DMH desde 2022.
DMH a keda un entidad Gubernamental, cu oficialmente a haya su ‘Instellingsbesluit’ desde 1 di oktober 2022. DMH ta e Departamento cu ta encarga cu ehecucion di e Tratadonan Internacional di Derecho di Mucha y tambe e Ley di Centro di Cuido di Mucha (Creche) na Aruba.
Durante e añanan trahando duro, den un team di a penas 5 persona, DMH a logra diferente meta riba termino largo y cortico. Pa menciona algun:
- A logra pa e Ley di Centro di Cuido di Mucha (Creche) drenta na vigor;
- Dialoga cu veld di Centro di Cuido di Mucha y yega hunto na un Manual di Regulacion pa Centro di Cuido di Mucha caminda tin e aspectonan minimo rekeri pa por opera un Centro;
- A crea un structura di cuido di Intervencion Trempan caminda cu DMH tin un specialista den cas cu por haci assessment pa por midi unda e mucha ta den su desaroyo. Si acaso e mucha su desaroyo ta kai atras, DMH conhuntamente cu mayor y centro ta yega na un plan pa yuda e mucha;
- Implementacion di Codigo di Proteccion pa tur 4 sector (husticia, social, enseñansa, salubridad);
- DMH tin un Toolkit digital pa e profesionalnan den veld caminda nan por acudi pa sosten na momento cu nan ta traha den un caso caminda tin sospecho di abuso di mucha;
- Revista Asertivo a lansa caminda cu e profesionalnan local por elabora riba nan trabou diario;
- DMH tin e registro nacional di tur Centro di Cuido di Mucha na Aruba.
DMH tin hopi mas logro cu por menciona, pero ta invita comunidad completo pa bishita su website www.dmh.aw, unda lo por haya e Boletin Informativo y asina por tin un bista hopi mas amplio.
Pa cu e atardi di apertura, tabata tin speech di e.o. Minister President sra. Evelyn Wever-Croes, Minister Rocco Tjon, Stan van Haaren di UNICEF Hulanda y Sue-Ann Ras cu ta encarga cu e guia di e departamento.
DMH ta situa den su localidad nobo na Seroe Blanco 17, net banda di Nature’s Discount y tegenover di APFA. E departamento tin hopi plan pa future, pa loke ta Centro di Cuido di Mucha, pero tambe prevencion den sospecho di abuso di mucha.
DMH kier a gradici di curason tur esunnan presente y tambe e stakeholders cu ta kere y ta traha cu DMH pa yega na un mihor maneho nacional na bienestar general di nos muchanan.
