No preocupa pa nada, ma den tur cos,pa medio di oracion y suplica cu gradicimento, laga boso peticionnan ta conoci dilanti di Dios,Y e pas di Dios cu ta surpasa, tur comprondemento,lo warda boso curason y boso mente den Cristo Hesus.( Filipensenan 4:6-7).
Nos comunicacion cu Dios pa medio di oracion ta hopi importante,tur locual cu nos ta bay haci, nos mester comunica na Dios, pasobra nos tur sa cu pa Dios no tin nada scondi, pero ora ta trata di respet na Dios, y reverencia na Dios, y confiansa den Dios , nos tin cu tuma tempo pa trece nos peticion su dilanti pasobra asina nos ta demostra confiansa.
Y esaki ta e confiansa,cu nos tin Su dilanti, cu si nos pidi cualkier cos,conforme Su boluntad,E ta tende nos. Y si nos sa cu E ta tende nos,den tur loke nos ta pidi,nos sa cu nos tin e peticionnan cu nos a pidi di dj’E. ( 1 Juan 5:14-15).
Serca Dios no tin peticion grandi, ni tampoco chikito, ta tur peticion cu ta den boluntad di Dios ta wordo atende, pasobra Dios ta doño di tur cos.
Nos tur ta depende di Dios, tur momento y den tur cos.
Pa medio di esaki nos sa cu nos permenece den dj’E y e E den nos, pasobra E a duna nos di Su Spirito.( 1 Juan 4:13).
Lo Bo warda den pas perfecto,esun cu su pensamento, ta permanece den Bo, pasobra e ta confia den Bo. Confia den Señor pa semper,pasobra den Dios e Señor nos tin un baranca eterno.( Isaias 26:4).
Confia den Señor cu henter bo curason, y no depende riba bo mes comprendemento. Den tur bo camindanan, reconoce’E y E lo dirigi bo berehanan. ( Proverbionan 3:5-6).
Bendiciona ta esun cu ta confia den Señor, cu ta pone Señor na prome lugar den su bida, y asina e mes lo mira con Dios, lo pone tur cos na su alcance , pasobra e a confia den Dios.
Deleita bo mes den Señor y E lo duna bo e deseonan di bo curason. Encomenda bo caminda na Señor, confia den dj’E y E lo hacie. Y E lo laga bo husticia briya manera lus, y bo derecho manera merdia.( Salmo 37:4-6).
Semper lo tin decepcion, ora nos kita nos confiansa for di Dios y pone nos confiansa den hende, pasobra hende ta vulnerabel, tur hende mester di yudansa di Dios, pero Dios ta Dios riba Su mes, e no tin mester yudansa di hende.Pasobra nos tin cu corda cu ta Dios ta creador di tur cos.
Y esnan cu conoce Bo nomber,lo pone nan confiansa den Bo, pasobra Abo, O Señor, no a bandona esnan cu ta busca Bo.( Salmo 9:10).
Den e tempo trabahoso, cu nos ta bibando, ta un exigencia pa nos confiansa aumenta den Dios, pasobra forsanan di maldad ta aumentando, y esnan cu no tin confiansa firme den Dios lo tambalea.
Mirando con maldad, mentira, y inmoralidad ta aumenta, y mas cu tur cos con hende ta gaña nan mes, nos tin cu tene bon cuenta con e enemigo ta domina mente di hende, cu no ta kere, ni tampoco ta confia den Dios.
Pesey e palabra di Dios ta bisa lo siguiente:Y no sea conforme na e mundo aki,ma sea transforma pa medio di e renobamento di boso mente, pa boso por compronde kico ta e bon, y agradabel, y perfecto boluntad di Dios. ( Romanonan 12:2).
Tin gran satisfaccion, ora nos pone tur cos den man di Dios.
Sinceramente, Pastor Marcel Balootje
