Otmar Oduber, lider di PPA a presenta e puntonan central di loke ta nan plan a largo plaso, Nos Aruba 2025-2050. El a indica cu e curazon di e plan aki ta rond di tres punto specifico cual ta:
1. Pensionadonan.
2. Costo di bida.
3. Salubridad.
Dunando atencion special na cada un di nan, el a amplia riba e parti di nos pensionadonan. PPA ta e prome partido a traves di Plataforma Nos Pais caminda cu for di aña pasa caba a cuminsa reuni cu instancianan manera OPPA, SVB, AZV y gremionan mientras cu ningun otro partido of parlamentario tabatin atencion pa nan. A papia riba e plannan pa soluciona e dolor di nos pensionadonan na Aruba. Den e plan ta bisa claramente cu PPA ta contra aumento di edad di pensioen manera ta proponi den e Landspakket. PPA ta kere cu mester haci e huiswerk y reduci gastonan di gobierno, duna e fondonan adicional necesario na AZV y SVB pa por cubri e diferencianan cu tin pa no recuri na e medida di aumenta edad di pensioen atrobe.
Pensionadonan mester haya un entrada mas husto cu ta cuadra cu e costo di bida cu tin na e momentonan aki.
Pensionadonan mester haya nan remedinan bek. No por ta asina cu nos pensionadonan ta keda sin haya nan remedinan pasobra nan no tin e placa pa paga pa nan, mirando e entrada cu nan tin y costo di bida haltisimo.
Mester percura pa e pensionadonan nunca mas lo bay paga 2 biaha pa e entrada cu ya caba e la paga un impuesto riba dje, manera ta tumando luga na e momentonan aki.
Lo adapta e leynan pa no castiga e pensionado den e momentonan mas vulnerabel di nan bida manera cu e ta na e momentonan aki.
Un otro punto presenta den e cuadro di e punto di pensionadonan, ta e parti di crea e oportunidad pa si e pensionado dicidi cu e kier sigui traha un poco mas despues di nan 65 aña, lo por parkeer nan pensioen y lo por cobra un poco mas despues. Pero na mes momento crea e posibilidad di por baha prome cu pensioen, cobrando un poco menos.
Otmar Oduber a menciona cu lo tin un excepcion na e regla aki, na unda esnan trahando den sector di construccion, lo por conta cu un flexibilisacion den ley pa nan por baha cu pensioen na edad di 62 aña cu pensioen completo debi na e trabou duro den e sector aki.
Esaki ta un vision general di loke ta e parti di pension den e plan Nos Aruba 2025-2050, cual lo ta disponibel pa tur hende por lesa desde fin di siman aki riba e diferente plataformanan di partido PPA.
